Реакција на Македонците од Италија, Франција и Швајцарија за изоставувањето на придавката „македонски“ во Извештајот на ЕК

Македонската православна културна заедница „Свети Кирил и Методиј“ од Франција, Македонска организација во Италија, „Камени Мост“ и Македонското добротворно друштво „Македонија“ од Швајцарија денеска испратија писма до еврокомесарот за проширување Штефан Филе поради изоставувањето на придавката „македонски“ во Извештајот на ЕК.

Овие здруженија сметаат дека како дел од македонската дијаспора мораат да ја изнесат загриженоста на сите Македонци кои живеат и се граѓани на Европската унија околу ова прашање.

Во писмата се нагласува дека Извештајот на Европската комисија за напредокот на Република Македонија е официјален документ во кој се пренесуваат ставовите и полтиките на Европската унија кон државата.

- Мораме да ја изразиме големата загриженост од фактот што евидентен е вложениот напор и тенденција на Европската комисија да се ограничи и сведе на минимум употребата на придавката „македонски“. Ваквиот обид за постепено бришење на зборот „македонски“ од речниците на Европската унија е директен удар врз нашите права и слободи, онакви какви што ги гарантира Универзалната декларација за човекови права, онакви какви што се очекувани од една напредна демократска цивилизација, онакви какви што секое човечко суштество заслужува да ги има и да ги ужива. Овој процес на негација на нашето битие нема да остане без одговор од македонскиот народ. Доказ за универзалната позиција на Македонците, како од Македонија така и од државите членки на Унијата се и бројните писма кои континуирано пристигнуваат на адресите на институциите на ЕУ, меѓу кои несомнено е и вашата, се вели во писмата на македонските здруженија од Италија, Франција и Швајцарија.

Во писмата, нагласуваат овие македонски здруженија, недвосмислено се потврдува и истакнува македонската свест која ја имаат луѓето.

- Верувајте дека нивната содржина не е фиктивна или имагинарна. Зборовите „Јас сум Македонец“, „Мојот јазик е македонски“, „Мојот идентитет е македонски“ доаѓаат директно од срцата на луѓе кои се чувствуваат како Македонци и кои не можат да се чувствуваат како нешто друго за да задоволат нечија желба, стои во писмата.

Македонските здруженија потенцираат дека се произлезени негативни ефекти од извештајот на ЕК кои, како што е нагласено, значително ја променија позицијата на Европската унија во однос на Македонија и македонскиот народ.

- Сметаме дека е неопходно сериозно да бидат земени предвид последиците од оваа се поотворена и евидентна промена на ставовите кон прашањето за името на нашата држава и идентитетот на нашата нација. Пораката која македонскиот народ ја упатува едногласно е дека овој нов пристап на Унијата не може и нема да донесе ништо добро. Напротив, ваков едностран притисок ќе вроди со дополнителна недоверба во целиот преговарачки процес, како и намерите на другата страна, а со тоа и на Унијата, се вели во писмата.

Македонската православна културна заедница „Свети Кирил и Методиј“ од Франција, Македонска организација во Италија, „Камени Мост“ и Македонското добротворно друштво „Македонија“ од Швајцарија упатуваат апел до Филе, до неговите колеги, до сите органи и институции на Унијата уште еднаш да ги преиспитаат своите позиции и ставови во однос на Република Македонија и Македонците како народ и култура, која е составен и уникатен дел од европската култура.