Тихомир Каранфилов

Во период кога Атина се соочува со целосен економски колапс и банкрот на земјата, секојдневни крвави штрајкови и  зголемен процент на  самоубиства, за да го сврти вниманието на јавноста од суровата реалност грчката влада се осврнува на спорот околу името со Македонија. Во извештајот на грчката влада за двегодишното работење на ПАСОК се вели дека и покрај економската немоќ кога е: “Во прашањето за името, ја зајакнавме нашата меѓународна поддршка, зголемувајќи го притисокот за изнаоѓање решение“

Меѓутоа Грција ни со педа не се поместува од своите претходни позиции и тие решението на проблемот го гледаат во тоа Скопје да прифати име со географска одредница за севкупна употреба. Наместо да се насочат кон решавање на економските проблеми, како што пренесуваат медумите според извештајот, тие успеале да преземат иницијативи и да ги убедат меѓународните партнери за „искреноста“ во нивните намери, а со тоа и целосно да ја променат климата која преовладувала во меѓународната заедница.

Исто така во извештајот било нотирано дека Скопје со своите потези не влева оптимизам. Како што вели Атина: “Ги осудивме и ги потенциравме со голем успех и во ЕУ и во пошироките меѓународни кругови, неодамнешните неприфатливи активности на Скопје, со методи на антиквизација кои не водат никаде. И покрај обесхрабрувачките пораки што стигнуваат од Скопје, ние продолжуваме да притискаме за брзо постигнување на решение“, притоа додавајќи дека Владата и покрај кризата, Грција е стабилна земја и фактор за развој во целиот региом.

Ваквите извештаи се појавуваат во грчкиот печат во период кога се исчекува одлуката на меѓународниот суд во Хаг. Како што пренесува весникот Елефтеротипија, „официјална Атина очекува избалансиран текст кој нема  да ја оправда ниту едната ниту другата страна.“ Во тој случај „ќе остане отворен простор за продолжување на преговорите во Њујорк“, пренесува грчкиот весник.

Од каде се темелат ваквите очекувања на грчката Влада и дали се само притисоци пред конечната одлука на меѓународниот суд, допрва ќе видиме. Меѓутоа дека има основа ваквото тврдење, можеме да видиме и од првото известување на американската телевизиска станица Си Ен Ен која ќе има неколку дневно јавување од Македонија, а главните теми ќе бидат Скопје 2014 и аеродромот Александар.  Во првото известување се стави акцент на изградбата спомениците, поточно на  споменикот на Александар, компарирајќи со стапката на вработеност и можноста истите да привлечат страни туристи со што би заживееела туристичката стопанска гранка.

Меѓутоа репортерката на Си Ен Ен посочувајќи на споменикот на коњ, односно на Александар Македонски дава до знаење дека во Македонија се врши антиквизација, а репортажата од аеродромот Александар Велики само треба суптилно да го потврди тоа. Познавајќи го влијанието кое го има Си Ен Ен во светот, Македонија од една страна ќе има добра туристичка рекламна кампања но со негативно влијание пред конечната одлука во Хаг. Така да и покрај очигледното вето на Грција за прием на Македонија во НАТО, во Букурешт, очигледно е дека прогнозите за избалансиран извештај од меѓународниот суд во Хаг се точни.

Но ако се знае дека се што работи Си Ен Ен е со амин на американската администрација, како  и што значеше за САД ветото на Грција во Букурешт за прием на Македонија во НАТО, останува да се прашаме за какви тактички потези на американската администрација се работи во овој момент.

Можеби една од причините за промена на курсот на САД е откажувањето на Грција од проектот за гасоводот Бургас - Александрополис и гасоводот „Јужен поток“ и покрај  најавената помош за Грција од Путин од 25 милијарди евра. Објавувајќи ја тајната телеграма на Стејт департментот грчкото списание Епикера пренесува дека во 2009 година грчкиот премиер Јоргос Папандреу се ангажирал пред Вашингтон за замрзнување на нафтоводот и гасоводот, додека американците го анализирале симнувањето од власт на претходниот кабинет на Костас Караманлис. Едноставно Американците со Караманлис не се чуствувале удобно по ветото на Грција за Македонија во НАТО и подоцна грчко-руското зближување во рамки на различни договори меѓу кои и увоз на оружје.

И додека под притисок на ЕУ, ЕЦБ и ММФ во Грција се најавуваат бугарски плати во приватниот сектор, кои доколку се прифатат би значело слободно намалување под 750 евра според колективниот договор, за тоа време веќе бројот на самоубиства во Грција драстично се зголемил. Најновите истражувања говорат дека се зголемува бројот на самоубиства  во Грција поради кризата, а се поголем е бројот на лица кои посегнуваат кон наркотици и проституција.

Но овие бројки се само предупредувања. Во Грција кризата допрва ќе се појави со целата своја жестина што ќе доведе според истражувањето до зголемување на сегашниот број на самоубиства на дополнителни 25 до 40 проценти. А банкротот на Грција е се посигурен. Доколку тоа се случи,  сето тоа ќе се одрази  на стабилноста на еврото и еврозоната. Отука како што сметаат некои страни експерти, грчката должничка криза  за Македонија не значи премногу и „земјата треба да биде благодарна што не е дел од еврозоната и што може да ја одржува својата економија конкуретна“.

Инаку грчката криза во Македонија  ќе предизвика краткорочни проблеми во кој ќе страда извозот, но долгорочно ќе се одрази врз ЕУ чие што проширувањето ќе биде успорено, а условите за зачленување потешки.