Гордана Димовска
Македонката Лиана Коњарски од Мелбурн постигна голем спортски успех во Австралија. Со својот клуб „Yarra Ranges Volleyball Club“ ја освои шампионската титула во женската Премиер 1 конкуренција, а нејзините одлични игри беа крунисани со две големи индивидуални признанија – за највреден играч (MVP) и за најдобар техничар (Best Setter) во лигата.
Гордост и радост владеат во македонската заедница во Австралија по големиот успех на Лиана Коњарски и нејзиниот клуб „Yarra Ranges Volleyball Club“.
На 30 август, на стадионот во Данденонг, клубот го освои големото финале во женската Премиер 1 конкуренција од Одбојкарската лига на Викторија. Успехот има посебно значење бидејќи ова е прва шампионска титула за клубот по 30 години, односно од 1996 година.
Посебен придонес во освојувањето на титулата имаше Лиана Коњарски, која за своите настапи доби и две значајни индивидуални признанија.
По големиот успех, Лиана за „Македонска нација“ изјави:
„Мојот клуб, Yarra Ranges Volleyball Club, го освои големото финале во женската Премиер 1 конкуренција од Одбојкарската лига на Викторија, на стадионот во Данденонг на 30 август. Ова е првпат нашиот клуб да ја освои титулата од 1996 година.
Исто така, на доделувањето на наградите ‘Volleyball Victoria Awards Night 2026’ бев прогласена за највреден играч (Most Valuable Player – MVP) во Премиер 1 лигата и за најдобар техничар (Best Setter) во лигата.
Овие признанија ми значат многу бидејќи ја сакам одбојката и играм од 2011 година. Зад мене се години на напорна работа и посветеност. Освојувањето на медалот беше нешто навистина посебно, бидејќи играв со неверојатни спортистки кои воедно се и мои најдобри пријателки.
Многу сум почестена што сум прогласена за MVP и најдобар техничар. Благодарна сум им на моите тренери, соиграчки и на моето семејство за поддршката.
Следно ќе настапувам за Викторија, во клубот Melbourne Vipers, во Австралиската одбојкарска суперлига. Тоа е националната и највисоката одбојкарска лига во Австралија. Нашиот тим има една цел – да го освои златото!
Натпреварите ќе се играат во Мелбурн, но ќе настапуваме и на гостувања во другите австралиски држави.“
Успехот на Лиана Коњарски е уште еден пример за младите Македонци во дијаспората кои со својот талент, труд и посветеност постигнуваат врвни резултати во земјите во кои живеат.
Нејзината одбојкарска приказна продолжува со нов голем предизвик – настапите за Melbourne Vipers во најсилната национална одбојкарска конкуренција во Австралија.
Карти и информации за натпреварите на Melbourne Vipers се достапни на официјалната страница за продажба на билети.
