Македонска Нација
Македонија е вклучена во плановите за воведување на Starlink Mobile V2 – новата генерација сателитска технологија што треба да овозможи брз интернет директно на мобилните телефони, без дополнителна сателитска антена.
Унгарската групација 4iG и американската компанија SpaceX потпишаа договори за воведување на сателитските комуникациски услуги Starlink Mobile во Унгарија и во земјите од Западен Балкан.
Според објавените информации, првата генерација на комерцијалната услуга Starlink Mobile најнапред треба да биде пуштена во Унгарија и Албанија. Во следната фаза се планира воведување на понапредната технологија Starlink Mobile V2 во Унгарија, Албанија, Црна Гора и Македонија.
Со тоа Македонија се вбројува меѓу пазарите во регионот во кои се очекува развој на новата генерација сателитско-мобилни комуникации.
Интернет директно од сателит до мобилен телефон
Starlink Mobile овозможува директно поврзување на мобилните телефони со сателитите на SpaceX во ниската Земјина орбита. Сателитите практично функционираат како базни станици во вселената, дополнувајќи ја земната мобилна мрежа таму каде што нејзината покриеност е слаба или воопшто не постои.
Особено значајно е што за користење на услугата не треба да биде потребна посебна сателитска антена. Според 4iG, директното поврзување ќе биде достапно преку мобилни телефони компатибилни со LTE-технологијата.
Новата верзија Starlink Mobile V2 ќе ги користи глобалните фреквенциски права на SpaceX во опсегот од 2 GHz и треба да обезбеди можности на 5G неземна мрежа. Тоа значи дека во иднина преку сателитска врска би можеле да бидат достапни брз интернет, интернет-пребарување, апликации, пренос на содржини и гласовни повици директно на мобилниот телефон.
Големо значење за планинските и оддалечените места
За Македонија оваа технологија може да биде особено значајна поради големиот број планински, рурални и тешко достапни подрачја. Starlink Mobile V2 би можел да обезбеди дополнителна покриеност во населени места, туристички центри и патни правци каде што изградбата на класична телекомуникациска инфраструктура е сложена или економски неисплатлива.
Сателитската врска може да биде важна и при природни непогоди, пожари, прекини на електричната енергија или привремено откажување на земната мобилна мрежа. Во такви услови технологијата би можела да помогне во одржувањето на комуникацијата меѓу граѓаните, јавните служби и критичната инфраструктура.
Претседателката и оперативна директорка на SpaceX, Гвин Шотвел, истакна дека технологијата V2 треба да обезбеди брза широкопојасна врска директно до мобилните телефони на корисниците во Унгарија и Западен Балкан.
Поврзување со новиот мобилен оператор во Македонија
Вклучувањето на Македонија во планот е поврзано со присуството на групацијата 4iG, чија подружница „Оне Македонија телекомуникации“ доби лиценца за работа како трет мобилен оператор во земјата. Компанијата истовремено развива сопствена самостојна 5G-мрежа, со план за поставување повеќе од 500 базни станици.
Во оваа фаза не е соопштен точен датум за комерцијално пуштање на Starlink Mobile V2 во Македонија. Динамиката ќе зависи од регулаторните одобренија, техничките подготовки и комерцијалните услови на секој од одделните пазари.
Сепак, самото вклучување на Македонија во планот претставува значајна најава. Доколку проектот биде реализиран според предвиденото, земјата може да стане еден од првите пазари во регионот со директна сателитска 5G-врска до мобилните телефони.
