Македонците во Њујорк заедно ја одбележаа 35-годишнината од независноста на Македонија со свечено подигнување на македонското знаме.
Во организација на Обединетата македонска дијаспора (ОМД), церемонијата се одржа на 26 септември во финансискиот центар на Њујорк, кај познатиот споменик „Разјарениот бик“. И покрај лошото време и најавите за бура, на собирот дојдоа десетици Македонци.
„Со овој гест сакаме да ги потсетиме сите дека сме тука и дека нема да нè снема. Како времето денес, имавме 35 тешки години, во кои се обидоа да нè избришат, но не им успеа и уште сме тука. Задачата на ОМД е да ги собере Македонците, бидејќи сме посилни кога сме заедно“, изјави за МИА Арџи Белио од ОМД.
На свеченоста беа изведени македонската и американската химна, а пејачката Андријана Јаневски настапи со песната „Земјо мила“.
Подигнувањето на знамето во Њујорк беше повод Македонците далеку од татковината повторно да се соберат, да ја прослават независноста и да покажат дека врската со Македонија останува силна.
