Обновената пруга ќе го пренасочи товарниот железнички сообраќај надвор од Скопје, а до крајот на август се очекува и нејзино официјално пуштање во употреба.
Завршена е реконструкцијата на железничката обиколница на Скопје, односно пругата на делницата Драчево – Илинден, со што ќе се овозможи товарните возови да се пренасочат надвор од градот, соопшти Министерството за транспорт.
Заменик-претседателот на Владата и министер за транспорт, Александар Николоски, заедно со директорот на ЈП Железници Инфраструктура, Синиша Ивановски, извршија увид во реконструираната делница, при што беше реализирано и тест-возење.
Според Николоски, по оваа пруга ќе се одвива исклучиво товарен железнички сообраќај, што ќе придонесе за подобра организација и поефикасен развој на железничкиот транспорт.
„Драго ми е што правиме тест-возење на обновениот железнички коридор, практичната обиколница на Градот Скопје, линијата меѓу Драчево и Илинден, со која товарните возови се вадат надвор од Градот Скопје.
Со реализацијата на овој проект многу се придонесува за заштита на животната средина и намалување на загадувањето во Скопје, имајќи предвид дека товарните возови повеќе нема да влегуваат во градот.
Ова е проект што го работеше ЈП Железници Инфраструктура и го заврши во максимално брз рок. Во моментов има тест-период, по што треба да се изврши технички прием и очекувам за дваесетина дена карго-возовите да ја користат оваа делница.
Тоа ќе значи многу за заштитата на животната средина и за намалувањето на загадувањето во Скопје, а од друга страна ќе овозможи побрз карго-сообраќај на Коридорот 10, што ќе донесе повеќе бизнис, повеќе железнички композиции на македонските пруги и значително ќе придонесе за развојот на стопанството и транспортот.
За многу брзо време, не подоцна од 1 септември, се гледаме и на пуштањето во употреба на Градскиот воз, со првата линија која ќе сообраќа од Зелениково, преку Драчево, до центарот на Скопје“, изјави Николоски.
