ОМД донираше пет дигитални табли за ООУ „Кузман Јосифовски Питу“ во Скопје
1 минута за читање
Со цел унапредување на наставниот процес и создавање подобри услови за образование, Обединетата македонска дијаспора (ОМД) донираше пет дигитални табли за потребите на ООУ „Кузман Јосифовски Питу“ во Скопје.
Од ОМД истакнуваат дека годинава посебен акцент ставаат на децата, образованието и младите генерации, верувајќи дека токму преку вакви проекти може да се придонесе за поквалитетно образование и подобри можности за учениците.
„Секоја нова можност за поквалитетно образование претставува нова шанса за развој, стекнување знаења и градење подобра иднина. Инвестирањето во децата е најважната инвестиција што може да ја направиме како заедница“, порачуваат од организацијата.
Донацијата е реализирана со поддршка на македонската дијаспора, која и понатаму активно придонесува во модернизацијата на образовниот систем и зајакнувањето на институциите што ги образуваат и воспитуваат идните генерации во Македонија.
Од училиштето изразија благодарност за донацијата, оценувајќи дека новите дигитални табли ќе придонесат за поинтерактивна и современа настава, како и за подобрување на образовниот процес за учениците и наставниците.
