Пациент од Скопје, кој се здобил со сериозна повреда на рбетниот мозок за време на одмор во турското летувалиште Кушадаси, со владин авион е транспортиран во Македонија и хоспитализиран на Универзитетската клиника за трауматологија, ортопедски болести, анестезија, реанимација и интензивно лекување (ТОАРИЛУЦ).
Информацијата ја соопшти директорот на Клиниката, д-р Игор Мерџановски, кој наведе дека пациентот бил повреден во несреќен случај на тобоган. На 23 јули му била извршена хируршка интервенција во болница во Кушадаси, каде што останал на лекување до организирањето на транспортот.
Организиран итен воздушен транспорт
По барање на турските лекари и поради сериозноста на повредата, бил организиран воздушен медицински транспорт со владин авион.
– Од колегите беше побарано пациентот да биде транспортиран по воздушен пат поради сериозноста на повредата и потребата од брз транспорт. Голема благодарност до Владата и до Службата за општи и заеднички работи, кои излегоа во пресрет за реализација на транспортот – истакна Мерџановски.
Во Турција бил испратен медицински тим предводен од раководителката на КАРИЛ, д-р Марта Тренева. Тимот го презел пациентот и го придружувал за време на транспортот до Скопје.
Пациентот е на интензивно лекување
Според директорот, пациентот бил успешно пренесен и сместен на одделот за интензивно лекување, каде што ќе продолжи неговиот третман.
– Пациентот е во здравствена состојба што бара интензивно лекување. Ја разгледавме медицинската документација и можам да кажам дека операцијата извршена во Турција е задоволителна и добро направена. Повредите на рбетниот мозок се меѓу најсериозните повреди – рече Мерџановски.
Тој најави дополнителни испитувања и понатамошна рехабилитација на пациентот, која ќе вклучува и физикална терапија во спиналниот центар во земјава.
