Галичник денеска беше домаќин на значаен настан посветен на зачувувањето и идниот развој на едно од највредните културни богатства на Македонија. Под покровителство на претседателката на државата, Гордана Сиљановска-Давкова, беше промовирана иницијативата на Месната заедница Галичник за зачувување, обновување и одржлив развој на ова легендарно мијачко село, препознатливо по својата богата историја, архитектура и традиција.
Пред претставници на дипломатскиот кор, меѓународни организации, бизнис секторот и локалната самоуправа, претставниците на Месната заедница Галичник, предводени од претседателот Огнен Караѓозовски, ја презентираа визијата за заштита и ревитализација на објекти од исклучително историско, културно и општествено значење.
Иницијативата предвидува активности за обновување и ставање во функција на неколку значајни објекти: вилата „Доста“, Културниот дом, Административниот објект и Галичката фурна, кои претставуваат важен дел од културното наследство на селото.
Во рамки на посетата, гостите имаа можност да се запознаат со дел од најзначајните знаменитости на Галичник, меѓу кои традиционалната галичка куќа „Филиповска“, црквата „Свети Петар и Павле“, куќата на Ѓорѓија Пулевски и црквата „Света Петка“. Посебен акцент беше ставен на Галичката свадба – една од најпрепознатливите и највредни културни манифестации во Македонија.
Во своето обраќање, претседателката Сиљановска-Давкова истакна дека Галичник не е само музеј под отворено небо, туку живо сведоштво за македонската историја, традиција и духовност.
„Неговото наследство живее во камените куќи, во црквите, песните, обичаите и во спомените на генерациите кои постојано му се навраќаат. Секој вложен напор во Галичник е вложување во нашето заедничко културно наследство и во иднината на државата“, порача претседателката.
Таа ја поздрави иницијативата на Месната заедница Галичник и повика на пошироко партнерство меѓу државните институции, локалната самоуправа, деловната заедница, иселеништвото и сите љубители на културното наследство, со цел да се обезбеди долгорочна заштита и одржлив развој на селото.
Според неа, зачувувањето на Галичник не претставува само грижа за минатото, туку создавање цврста основа за идните генерации, покажувајќи дека традицијата и современиот развој можат успешно да се надополнуваат.
На крајот од настанот, Месната заедница Галичник ѝ додели посебно признание на претседателката Сиљановска-Давкова за нејзиното покровителство, поддршка и личен придонес во афирмацијата на Галичник и Галичката свадба, како и за поддршката на иницијативите насочени кон зачувување на културното наследство и развојот на селото.
