Со традиционалната манифестација почнува одбележувањето на Илинден и 123-годишнината од Илинденското востание и Крушевската Република
Со кревањето на знамето на Крушевската Република на Гумење и со свечена програма, вечерва во Крушево почнува традиционалната манифестација „10 Дена Крушевска Република“.
Со нејзиното отворање започнуваат чествувањата по повод Илинден – Денот на Републиката и 123-годишнината од Илинденското востание и Крушевската Република.
Програмата почнува претпладне со положување цвеќе на гробот на Даме Груев, по што делегации на манифестацијата и на Општина Крушево ќе ја посетат Спомен-куќата на Смилевскиот конгрес во селото Смилево.
Во 18 часот, пред Столбот на Крушевската Република, кој се наоѓа до црквата „Свети Никола“ во центарот на Крушево, свечено ќе бидат пречекани илинденските коњаници. Потоа ќе биде формирана поворка која ќе се упати кон платото на Гумење.
– Очекуваме од 120 до 140 коњаници од повеќе места во Македонија. Со посебен пиетет ќе им биде оддадено признание на коњаниците, кои ги продолжуваат илинденските традиции – изјави Захарија Ангелеска од Националната установа – Дом на културата „10 Дена Крушевска Република“.
Делегациите ќе положат цвеќе и ќе им оддадат почит на македонските херои и на повеќе значајни спомен-обележја: гробот на Питу Гули на Гумење, споменикот на Партизанските гробишта, гробот на Тоше Проески, криптата на илинденските востаници и бистата на Веле Марко.
Во 19:30 часот, пред споменикот „Илинден“, ќе биде отворена изложбата на Државниот архив, насловена „Илинденското востание во архивската меморија“.
Свеченото отворање на манифестацијата е закажано за 20 часот на Гумење. Предвидено е обраќање на градоначалникот на Крушево, Нико Чонески, читање на Крушевскиот манифест и традиционално симболично пукање од Црешовото топче – еден од најпрепознатливите симболи на Илинденското востание и Крушевската Република.
Покрај свечениот дел на Гумење, музичка програма ќе се одржува и во Градскиот парк во центарот на Крушево.
– Годинава главен покровител е Општина Крушево. Подготвена е интересна програма, при што го зачувуваме традиционалниот начин на празнување. Главното збиднување ќе биде на Гумење, додека забавниот дел ќе се одвива во Градскиот парк во центарот на Крушево – истакна Ангелеска.
Централното чествување на Илинден ќе се одржи утре, на 2 август, на Мечкин Камен. На Големиот народен собир е најавено обраќање на потпретседателот на Собранието, Антонио Милошоски.
Крушево и годинава ќе биде средиште на сенародното чествување на Илинден – празникот што ги обединува споменот за храброста на илинденците, слободарскиот дух на македонскиот народ и вековниот стремеж за слободна и самостојна Македонија.
