Македонска Нација
1946 – Почнало Првото заседание на Народното собрание на Македонија
На 1 септември 1946 година во Скопје било отворено Првото заседание на избраното Народно собрание на Македонија.
Седницата ја отворил најстариот пратеник, македонскиот револуционер и илинденец Крсто Гермов – Шаќир Војвода. Со почетокот на работата на Собранието продолжило институционалното градење на македонската држава, чии темели биле поставени на Првото заседание на АСНОМ на 2 август 1944 година.
1967 – Починал Емануел Мане Чучков
На 1 септември 1967 година во Скопје починал Емануел Мане Чучков, македонски државник, професор, географ, културен и национален деец.
Роден е на 27 ноември 1901 година во Ново Село, Штипско. Во младоста бил дел од Македонската младинска тајна револуционерна организација, а подоцна учествувал во подготовките и во работата на Првото заседание на АСНОМ.
На заседанието бил избран за потпретседател на Президиумот на АСНОМ. Се залагал за поголем суверенитет на Македонија и за обединување на македонскиот народ. Поради ваквите ставови бил политички отстранет од високите функции.
Чучков оставил значајни трудови од областа на географијата, историјата, етнографијата, фолклористиката и просветата. Бил еден од истакнатите македонски интелектуалци и државотворци од генерацијата на АСНОМ.
