Македонска Нација
На 22 и 23 септември, во Меморијалниот центар на Холокаустот на Евреите во Македонија (ФХЕМ) во Скопје, ќе се одржи културно-меморијалната манифестација „Патување кон корените“, посветена на трагичните судбини на децата прогонети од Егејска Македонија.
Во рамките на манифестацијата ќе бидат прикажани документарниот филм „Македонецот“ и изложбата „Мајко мила“ на Петро Алексовски, Македонец кој живее и твори во Полска.
Преку фотографии, уметнички дела, сведоштва и човечки судбини, настанот ќе потсети на едно од најболните поглавја во поновата македонска историја.
Пред повеќе од седум децении, во виорот на воените судири и човечкото страдање, илјадници македонски деца биле одделени од своите родители, домови и од сопственото детство. Заминале без да знаат каде ги водат, дали повторно ќе ги видат мајките и татковците и дали некогаш ќе зачекорат по патеките на своето родно место.
Нивни нови домови станале далечни и непознати земји – Полска, Чехословачка, Унгарија, Романија и други држави. Таму пораснале, создале семејства и изградиле нов живот. Но никогаш не ги заборавиле своите македонски корени: мирисот на родната земја, песните од детството, мајчиниот глас, името на своето село и детскиот џагор што засекогаш останал по ливадите и селските дворови.
„Патување кон корените“ нема да биде само изложба и проекција на документарен филм, туку и патување низ заедничката меморија – човечка приказна за разделбата и страдањето, но и за надежта, љубовта што никогаш не згаснала и духовното враќање кон корените.
Манифестацијата ќе ги оживее нивните спомени, не за да останеме заробени во минатото, туку за да ја сочуваме вистината и да им ја пренесеме на идните поколенија.
