Коњаницата „Св. Јован Бигорски – Патот на Црешовото Топче“ денес, 28 јули 2026 година (вторник), ќе го продолжат својот седумнаесетти поклоннички и илинденски марш кон Крушево и Мечкин Камен.
Новиот ден започнува рано, во 07:00 часот, со поаѓање од бачилото Салтаница, по патеката што минува покрај бачилото Сулумуница.
Пред коњаниците е уште една етапа низ прекрасните, но и предизвикувачки предели на Бистра, каде секој чекор претставува потсетник на истрајноста, заветот и љубовта кон Македонија.
Според планираната маршрута, околу 11:00 часот се очекува пристигнување во бачилото Раштанец, каде ќе биде направена кратка пауза за одмор и освежување на коњите и учесниците.
По паузата, коњаницата ќе го продолжи патот кон едно од најзначајните духовни светилишта во овој дел на Македонија – манастирот Кнежино. Таму, според програмата, се очекува да пристигне околу 16:00 часот, каде коњаниците ќе бидат пречекани со традиционално гостопримство и ќе се поклонат во манастирскиот храм, барајќи благослов за последните денови од маршот кон славното Крушево.
28 јули 2026 (вторник)
- 07:00 – Поаѓање од бачило Салтаница покрај бачилото Сулумуница.
- 11:00 – Пристигнување во бачило Раштанец.
- По кратка пауза, продолжување кон манастирот Кнежино.
- 16:00 – Пристигнување во манастирот Кнежино.
Маршот „Патот на Црешовото Топче“ не е само патување низ македонските планини. Тој е жив завет што веќе седумнаесет години ги поврзува верата, традицијата, историјата и љубовта кон татковината. Со секој изминат километар коњаниците ја носат пораката дека споменот за илинденците и нивната жртва останува жив, а нивниот идеал продолжува да ги обединува генерациите Македонци.
Патувањето продолжува, а секој нов ден ги приближува кон нивната крајна цел – Мечкин Камен, каде и оваа година достоинствено ќе им се поклонат на хероите на Илинден, продолжувајќи го аманетот што тие го оставија за идните поколенија.
