Во конкуренција на 48 тимови од 22 држави, македонските специјалци го освоија деветтото место и се најдоа меѓу трите најдобри тимови за ферплеј.
Снајперските тимови на Специјалната антитерористичка единица „Тигар“ остварија значаен успех на меѓународниот натпревар во снајперско гаѓање „БОРАН 8“, одржан во Република Турција.
Во силна конкуренција на 48 тимови од 22 држави, македонските специјалци го освоија високото деветто место. Првите седум места им припаднаа на тимови од Турција, додека осмото место го освои тим од Азербејџан.
Особено впечатлив беше резултатот во дисциплината пиштолско гаѓање, во која македонските специјалци освоија 2.098 поени — значително над натпреварувачкиот просек од 1.173 поени.
Покрај високиот пласман, македонскиот тим доби признание и за професионалниот однос и спортскиот дух, вбројувајќи се меѓу трите најдобри тимови во категоријата „ферплеј“.
Со прецизноста, подготвеноста и коректниот однос кон другите учесници, припадниците на САЕ „Тигар“ достојно ја претставија Македонија и покажаа дека можат рамноправно да се натпреваруваат со елитни тимови од повеќе држави.
