Во Спомен-паркот во селото Непроштено, на 23 јули 2026 година, ќе се одржи комеморативна манифестација по повод 25-годишнината од киднапирањето и убиството на Македонците – жители на селото, кои трагично ги загубија животите за време на конфликтот во 2001 година.
Комеморацијата, под мотото „25 години – сеќавањето живее“, ќе започне во 18:30 часот пред Спомен-паркот во центарот на Непроштено.
Организатор на настанот е Иницијативниот одбор, во соработка со семејствата на киднапираните и убиените жители на селото.
Редослед на активностите
- Прием на гостите и делегациите
- Интонирање на државната химна на Република Македонија
- Панихида
- Полагање цвеќе пред спомен-обележјето
- Кратко обраќање на Иницијативниот одбор
„Со наведнати глави и длабока почит ќе им оддадеме вечен помен на нашите сограѓани, чии животи беа насилно прекинати, но чие име и жртва засекогаш ќе останат врежани во нашата колективна меморија“, се наведува во поканата.
Од Иницијативниот одбор посочуваат дека комеморацијата претставува чин на достоинство, почит и благодарност, но и силна порака дека вистината, правдата и сеќавањето не смеат никогаш да бидат заборавени.
Присуството на граѓаните ќе биде израз на почит кон жртвите, поддршка за нивните семејства и заедничка заложба идните генерации да ја паметат оваа трагедија.
Вечна им слава!
Нека почиваат во мир!
25 години сеќавање | 2001–2026
