Три пати одложувана, собраниската седница за гласање за предлогот за пристапување кон уставни измени започна синоќа во 22 часот. Во меѓувреме власта успеа да го обезбеди потребното двотретинско мнозинство, а опозициската ВМРО-ДПМНЕ обвини дека се врши обид за тргување со слободата на дел од пратениците. Кои се причините за премислување на опозициските пратеници да гласаат „за“ уставните измени?
На петмина од 8-те пратеници потребни за двотретинско мнозинство, над глава им висат судски процеси.
Откако премиерот Зоран Заев најави помирување, судот во последните четири дена одлучи да го укине куќниот притвор на тројцата пратеници од ВМРО-ДПМНЕ, обвинети во случајот за собраниските случувања на 27 април минатата година. Според судот, понудената гаранција, во имот и пари, била доволна.
Пратеникот Љубен Арнаудов, е пуштен од куќен притвор откако Апелацискиот суд му ја прифати жалбата. Пред Судот тој достави гаранција од 300.000 евра.
Василевски исто така беше пуштен да се брани од слобода со гаранција од околу 400 илјади евра, одлучи кривичниот совет на скопска единица.
Крсто Мукоски беше последен ослободен, на денот на гласање и тоа без никаква гаранција, туку само со прифаќање на жалбата за продолжениот куќен притвор.
Тројцата обинети, Крсте Мукоски, Љубен Арнаудов и Сашо Василевски вчера гласаа „за“ уставни промени.
Елизабета Канческа – Милевска е прво обвинета во случајот „Тендери“ за извршување градежни работи во Музејот на македонската борба за државност и самостојност, дел од проектот „Скопје 2014“. СЈО ја сомничи дека без почитување на Законот за јавни набавки и без спроведување на јавно наддавање склучила договор со изведувач за дополнителни градежни активности.
Синот на пратеничката Владанка Авировиќ од Социјалистичката партија, е веќе осуден во случајот „Труст“, за незаконското добивање на тендер на ЕЛЕМ. На потег е Апелациониот суд, кој допрва треба да одлучува по основ на жалбите.
„ЗА“ уставни промени од опозициските пратеници гласаа и Емилија Александрова, Нола Исмајловска Старова и Зеќир Рамчиловиќ, а во текот на вчерашниот ден од опозицискиот табор јавно обвинија за притисоци и влијанија врз нивни пратеници, споменувајќи понуди кои се движеле и до милион евра за притиснато копче „за“, што власта го демантираше.
Елизабета Канческа Милевска, Емилија Александрова, Нола Исмаиловска, Сашо Василевски, Љубен Арнаудов, Крсто Муковски и Зеќир Рамчиловиќ од вчера не се членови на ВМРО-ДПМНЕ. Извршниот комитет на вонредна седница ги исклучи од партијата, само еден час откако гласаа да се отвори расправа за уставните измени.
Сања Трајковска Ставров
