Претседателот на ВМРО-ДПМНЕ и премиер, Христијан Мицкоски, ја најави новата кампања „Очи в очи за подобро“, во рамки на која тој лично, заедно со членовите на Извршниот комитет на партијата, ќе реализира интензивни посети на општинските и месните комитети низ државата.
Кампањата беше најавена на 35. годишна конференција на Унијата на млади сили на ВМРО-ДПМНЕ, која се одржува во салата „Расадник“ во општина Кисела Вода, под мотото „Нашата генерација – нашата Македонија“.
Мицкоски најави дека активностите ќе започнат уште од претстојниот викенд и ќе продолжат во текот на наредните месеци, сè до крајот на годината. Предвидени се посети на градови, населени места и општински организации, со цел непосредна комуникација со граѓаните и запознавање со нивните проблеми, потреби и очекувања.
„Ќе одиме од град во град, од населено место до населено место. Почнуваме кампања „Очи в очи за подобро“, истакна Мицкоски.
Тој посочи дека целта на кампањата е да се воспостави директен разговор со граѓаните, без однапред подготвени одговори и без потреба сите да размислуваат исто. Според него, постојат проблеми и прашања што не можат целосно да се согледаат преку извештаи, статистики и состаноци, туку мора да се слушнат непосредно од луѓето.
Мицкоски нагласи дека на средбите ќе се разговара и за реализираните проекти, започнатите активности, но и за работите што не функционираат и треба да се подобрат.
„Не за да слушнеме само пофалби. Не за да ја повторуваме веќе познатата слика. Туку за да разговараме и за она што функционира, но и за она што не функционира“, порача премиерот.
Тој додаде дека ваквите средби нема да значат дека секој проблем може веднаш да се реши, но директната комуникација ќе овозможи да се утврди што недостига, кој е надлежен и кои прашања треба повторно да се разгледаат.
„Нема напредок без вистина за состојбите, нема доверба без почит, нема подобро без работа што може да се измери“, истакна Мицкоски, најавувајќи дека партијата ќе продолжи со средби со граѓаните и во наредниот период.
Тој најави дека од напролет активностите ќе продолжат преку трибини и средби со народот, од село во село и од град во град, со цел заеднички да се работи на подобра иднина, особено за младите.

