Кризната состојба ќе важи на целата територија на Македонија во период од 30 дена, почнувајќи од 1 август 2026 година
Владата на денешната седница донесе одлука за прогласување кризна состојба на целата територија на Македонија поради зголемениот ризик од пожари на отворено и шумски пожари.
Одлуката ќе важи 30 дена, почнувајќи од 1 август 2026 година, а нејзина цел е навремено, координирано и ефикасно справување со состојбата на терен, како и целосно мобилизирање на расположливите институционални капацитети за заштита на граѓаните, нивниот имот и природните ресурси.
Со одлуката се предвидува активирање на Главниот штаб при Центарот за управување со кризи, кој ќе заседава постојано. Во рок од 24 часа Штабот треба да изготви акциски план за превенција и справување со пожарите, преглед на расположливите човечки и материјално-технички ресурси и план за координирано дејствување на надлежните институции.
Владата ги задолжи сите органи на државната управа да постапуваат во согласност со прописите за управување со кризи и целосно да ги стават на располагање своите капацитети за навремена и ефикасна реакција на терен.
Оттаму нагласуваат дека одлуката е дел од проактивниот пристап и целосната мобилизација на институциите за заштита на животите и имотот на граѓаните, животната средина и националните ресурси.
