ВМРО-ДПМНЕ, во реакција на изјавите на Богданка Кузеска, ја обвинува СДС дека свесно создава хистерија со цел да предизвика страв и несигурност кај граѓаните. Од партијата го повикуваат Јавното обвинителство да реагира по член 315 од Кривичниот законик, кој се однесува на делото саботажа.
Во продолжение го пренесуваме соопштението:
„СДС никако да престане со умисла да создава хистерија со цел да им предизвика штета на државата и на граѓаните. Нивното однесување е неприфатливо.
Додека државата и надлежните институции прават сè и ги преземаат сите мерки за да ги заштитат интересите и парите на граѓаните, СДС прави сè за да го саботира тоа.
По случаите со создавање хистерија и предизвикување страв, паника и несигурност кај граѓаните за водата за пиење во Скопје и во Гостивар, за наводниот колапс на ПИОМ и за ред други прашања, а сега и за случајот со „Алта банка“, редно е во СДС да се освестат што прават.
Го повикуваме Јавното обвинителство да реагира по член 315 од Кривичниот законик, за делото саботажа, во кој стои:
„Тој што во вршењето на својата работна обврска со намера да го загрози уставниот поредок или безбедноста на Република Македонија на прикриен, подмолен или друг начин, ќе предизвика значителна штета за државен орган, установа или правно лице во кое работи или за друг државен орган, установа или правно лице, ќе се казни со затвор најмалку три години“.
Во дејствувањето на СДС, преку одржувањето прес-конференции пред витални државни институции, како што е Народната банка, и секојдневното изнесување обвинувања кон неа, гледаме основи за ваквото дело. Сметаме дека свесно и со умисла сакаат да им предизвикаат штета на државен орган, на правно лице, како и на штедачите, односно на македонските граѓани.
СДС не се грижи ниту за штедачите ниту за доверителите на банката. Прави сè за да му наштети на процесот за заштита на интересите на граѓаните, државата, доверителите и штедачите“, се наведува во соопштението на ВМРО-ДПМНЕ.
