ВМРО-ДПМНЕ: Резултатите од анализите за водата треба да ги објави ЈП „Комуналец“ Гостивар
ВМРО-ДПМНЕ реагираше на прес-конференцијата на Наташа Поповиќ од СДС, нагласувајќи дека резултатите од испитувањата на водата во Гостивар треба да бидат побарани од градоначалникот Валбон Лимани и од ЈП „Комуналец“ Гостивар.
Од партијата посочуваат дека анализирањето, испитувањето и објавувањето на резултатите се во директна надлежност на јавното претпријатие.
„Секоја анализа, секое испитување и неговото објавување е директна надлежност на ЈП ‘Комуналец’ Гостивар. За ова прашање нека се обратат до Валбон Лимани и нека му кажат да ги објави резултатите“, се наведува во соопштението.
Според ВМРО-ДПМНЕ, градоначалникот е надлежен за именување и разрешување на директорот на ЈП „Комуналец“. Партијата тврди дека одговорноста за направениот превид при дистрибуцијата на водата е кај раководството на претпријатието, додавајќи дека директорката е приведена.
Во реакцијата се наведува дека Владата, предводена од ВМРО-ДПМНЕ, интервенирала поради неспособноста на градоначалникот и локалните институции. Оттаму велат дека водата била исчистена во рекорден рок, по што најпрвин била пуштена за техничка употреба, а потоа и за пиење.
Од партијата додаваат дека во меѓувреме на жителите на Гостивар секојдневно им била доставувана флаширана вода, додека СДС, како што тврдат, не донирал ниту едно шише.
„По еден месец кризата во Гостивар е минато. Обвинителството треба да ја утврди одговорноста и да бидат казнети сите што имаат и најмала индиректна одговорност за случајот“, порачуваат од ВМРО-ДПМНЕ.
Во соопштението се упатуваат обвинувања и до поранешните министри за здравство од СДС, вклучувајќи го и претседателот на партијата, Венко Филипче. ВМРО-ДПМНЕ тврди дека до него стигнале повеќе од 400 испитувања за загадена вода, но дека не реагирал.
„СДС и Филипче со години не реагирале, а денес само обвинуваат. Граѓаните го препознаваат нивното лицемерие“, се наведува на крајот од партиската реакција.
