Транскрипција на службена белешка од 16 октомври 1978 година
РСВР на СРМ СДБ – Скопје
Испостава на СДБ Струмица
[прецртано]
Струмица, 16.10.1978 год.
Евиденција бр. 132/18-266
17.10.1978 год.
СЛУЖБЕНА БЕЛЕШКА
Извор: [прецртано]
Објект: Емиграција
Лица: Гојко Јаковлевски, емигрант во Берлин
Мане Јаковлевски, емигрант во Берлин
Стојан Ковачев од Струмица, на привремена работа во Париз – Франција.
Разговорот е обавен по иницијатива на инспекторот.
Разговорот е обавен во просториите на ИСДБ–Струмица.
Во врска со активноста на членовите на ДООМ во Берлин, Мане и Гојко Јаковлевски, врската го изнесе следното:
„Негде во пролетта (март или април) 1978 година Гојко и Мане купиле комплет дресови за ФК ‘Илинден 1903’. За разлика од порано овој дрес нема натпис. Тоа го сториле од причина што порано југословенскиот конзулат реагирал во врска со натписот на дресот ‘Македонија – Ново Скопје’, фактички тоа е фирмата на Мане.
И Гојко и Мане лично пред мене често пати зборуваат и истапуваат, дека Југославија треба да се бори за одземање на Егејскиот и Пиринскиот дел од Македонија како што тоа го чини спрема Австрија за Корушка“.
Во врска со празникот „Илинден“ Мане во неговиот ресторан организирал прослава. На прославата присаствувале околу 40 лица Македонци на привремена работа во Берлин. Од Струмичани присуствувал Парамазов Наќе на кого брачната другарка се вработила како садоперачка во кујната од ресторанот на Мане.
Во почетокот на август 1978 година кај врската дошол Стојан Ковачев од Струмица инаку на привремена работа во Париз. Ковачев изјавил дека предходно ги посетил Мане и Гојко од каде бил испратен да се јави кај врската за да го поврзе со Ѓорѓиев Киро од Струмица со кого наводно биле блиски роднини. Ковачев кај врската се задржал околу 2 часа а потоа го замолил со колата да го пренесе до границата на Источна Германија бидејќи Киро Ѓорѓиев бил дојден на одмор и немал можност и да се сретнат.
По патот врската го прашал Стојан по кој основ дошол во Берлин, на што одговорил, дека дошол да се прошета. Самиот Стојан истакнал дека во Берлин престојува и во 1975 година. Изјавил дека е на работа во Париз, работел на лесна работа и имал доста време за шетање. Се пофалил дека имал и сопствена куќа во Париз.
ОЦЕНА НА ИНСПЕКТОРОТ
Напорите на Мане и Гојко не престануваат за што почестите контакти со наши работници на привремена работа во Берлин и нивно вклучување во манифестациите што тие ги организираат (фудбалски натпревари, прослави, свечености и др.). Тие во таквата активност дури финансираат и сопствени средства. Секако за нивната активност е дејноста на ДООМ.
Престојот на Ковачев во Берлин не е случаен. Тој остворил контакти со членовите на ДООМ – Мане и Гојко. Таква турнеја до Берлин остворил и во 1975 година, тоа зборува дека Ковачев е вклучен во активноста на ДООМ. Ваквата оценка уште повеќе се потврдува со фактот што тој при секој престој во земјата редовно контактира со лица судени за ВМ-дејност (Андонов Ѓорги од Струмица), неговите чести патувања за Бугарија како и напорите за собирање литература со пишувана содржина за битнието на македонската нација. Во врска со тоа ја барал и Историјата на македонскиот народ.
Во идните наши оперативни настапи и зафати ќе настојуваме активноста на Ковачев да ја документираме. И активноста на браќата Јаковлевски ќе ја следиме преку нашите оперативни врски во Берлин.
Отчукано во 4 примероци
3 до РСВР на СРМ СДБ Скопје
1 за инспекторот
Инспектор: [потписот/името е прецртано]
