Тихомир Каранфилов
Тома Прошев е роден на 10 ноември 1931 година во Скопје, а починал на 12 септември 1996 година на хрватскиот остров Зларин.
Тома Прошев е Македонски композитор, диригент и музиколог, еден од најистакнатите автори на македонската современа музика и меѓу првите композитори што внеле нов звук во македонското музичко творештво.
Гимназија завршил во родниот град. Во 1957 година дипломирал на Одделот за музичка педагогија и теорија на Музичката академија во Загреб. Во 1960 година дипломирал композиција на Академијата за музика во Љубљана, во класата на професорот Луцијан Марија Шкерјанц, каде што и магистрирал.
Своето образование го надградувал во Париз, во класата на Надија Буланже, усовршувајќи се во областа на композицијата и музичката интерпретација. Во 1981 година докторирал по музикологија на Музичката академија во Сараево.
Во периодот од 1959 до 1967 година работел како професор во Музичкото училиште „Ватрослав Лисински“ во Загреб, а од 1967 до 1991 година предавал на Факултетот за музичка уметност во Скопје. Бил ангажиран и како диригент во Загрепската филхармонија, како и во Операта и балетот на Македонскиот народен театар во Скопје.
Во 1968 година во Скопје го основал Ансамблот за современа музика „Света Софија“. Со него постигнал значајни успеси во Македонија и во странство, изведувајќи современи дела од композитори од целиот тогашен југословенски простор.
Прошев ја збогатил македонската музика со бројни дела: симфонии, кантати, ораториуми, концерти за различни инструменти, оркестарска и камерна музика, опери и балети. Во своите композиции често вклучувал елементи од македонскиот фолклор, обработувајќи ги со примена на современи композициски техники.
Меѓу неговите познати оперски дела се „Пајажина“ (1958), „Малиот принц“ (1965) и „Аретеј“ (1972), чија втора верзија ја создал во 1987 година. Од балетското творештво се издвојуваат „Рамки и одѕиви“ (1963), „Песна над песните“ (1967) и „Три сестри“ (1986).
За својата работа добил повеќе награди, меѓу кои „4 Јули“, „11 Октомври“, „13 Ноември“ и „Панче Пешев“.
Со своето композиторско творештво, педагошка работа и диригентска дејност, Тома Прошев оставил значаен белег во развојот и афирмацијата на македонската современа музика.
