ДОЈЧЕ ВЕЛЕ: Спиновите не помогнаа, бламажа на западот во Македонија
Слабата излезност на референдумот во Македонија е шамар за западот и тука спиновите за изборните резултати не помагаат пишува Дојче Веле.
Луѓето на Балканот се уморни од фразата “европска перспектива” и “заедница на вредности”, стои во анализата на Дојче Веле. Одѕивот изнесува само 36,9 отсто, а поддршката за промена на името дадоа 91,5 отсто од излезените на референдумот.
Овие два фактори за македонскиот референдум германскиот Франкфуртер алгемајне цајтунг ги става во контекст: “Поддржувачите на власта посочија дека де факто излезноста на гласачите беше доста повисока. Стотици илјади Македонци се преселија надвор од нивната татковина во последниве години, но се уште се наоѓаат на избирачките списоци. Во некои региони особено погодени од емиграцијата ќе беше потребен одѕив од 70 отсто или повеќе за да се дојде до 50 отсто излезност. ”
Премиерот Зоран Заев го призна ова, надевајќи се дека и покрај малиот одзив, тој може да има доволно аргументи за промовирање на уставните измени преку парламентот. “Ако беше постигнат потребниот цензус, можеби ќе беше разбирливо дека пратениците на ВМРО-ДПМНЕ, која во Парламентот во Скопје има најголема парламентарна група, заедно со владејачката партија, ќе гласаа за промена на Уставот. Но, тоа сега отпаѓа, бидејќи одѕивот беше далеку од потребниот”, пишува ФАЦ.
Во краток коментар, кој беше објавен од страна на истиот весник пишува дека, по толку лоша излезност „политичарите кои инаку постојано зборуваат за тоа како демократијата е посебна вредност, не треба бараат парламентот да гласа за Договорот од Преспа. Особено е збунувачко што во Грција се жалат на национализмот во регионот, бидејќи спорот за името немаше да постои без апсурдните барања на Атина. Македонските пратеници, секако, може, и покрај се, да донесат одлука за промена на името, но тоа треба да го прават со своја волја. Во секој случај, Западот треба да има план Б.
Новинарката на Велт од Скопје вели дека “еуфорија може да се предизвика губење на чувство за реалност” – и тука се мисли на изјавите на западните политичари за тоа како референдумот е наводно голем успех. “И НАТО и ЕУ претрпеа голем пораз, што не се споменува во нивните изјави. Слабиот одзив на гласачите е срам за Западот, од каде најважните политичари последниве неколку недели ја посетија Македонија и го промовираа Договорот од Преспа”, додава угледниот берлински весник.
Слично пишува и минхенскиот Зидојче Цајтунг. Само една третина од гласачите гласаа и во таа смисла „ги изненадија лидерите од Скопје и Брисел. И покрај сите бројки од неуспешниот референдум, тие се обидуваат да го продадат како успех. По борбата за гласовите започна расправија за толкувањето на резултатите. Прво, комесарот на ЕУ Јоханес Хан опасно избрза. Тој ги повика политичарите да ја прифатат одлуката и да работат за благосостојбата на земјата, без оглед на партиските поделби. А тоа значи: да го прифати новото име на земјата. ”
“Позицијата на Хан е разбирлива ако се знае дека западната дипломатија многу инвестираше во Договорот од Преспа. Но тоа е направено само во последно време, и токму тука е проблемот. Долгогодишната политика на грчката блокада се сметаше за билатерален проблем. За некои европски политичари, грчката кочница беше дури и добредојдена – тие не беа многу заинтересирани за новото проширување на НАТО и на ЕУ “.
Новата западна офанзива со шарм не ги импресионираше граѓаните на Македонија, пишува Зидојче. “Наместо тоа расте аверзијата кон реториката на интеграција: европска перспектива, вредности на заедницата, семејството нации – кој би сакал да го слуша тоа во европската чекална? Влијанието на ЕУ не ја уништи руската или турската мека сила (особено во Македонија која се плаши од Бугарите и Србите што зборуваат руски јазик). Тука станува збор за неодлучноста на ЕУ, и пред сè неодлучноста на нејзините членки – што не знаат што да прават со земјите од Западен Балкан “.
Познатиот швајцарски весник Ноје Цирхер Цајтунг ја коментираше изјавата на Хан дека Македонците убедливо поддржале промена на името: “Ова едноставно не е точно. Хан го раскажува фактот дека во земјата очигледно нема мнозинство за промена на името наметнато од Грција. Тоа е горко за ЕУ и НАТО, кои со месеци се залагаат за договорот. Ова покажува колку, во меѓувреме, е намалено влијанието на Брисел на Западен Балкан. Тука не помагаат ни омилените изговори дека за состојбата се криви „руските манипулации“ на социјалните мрежи.
