Николоски
Се потврди дека ја говорев вистината за Вице Заев
Денеска сфативме неколку работи од распитот на тужителот Вице Заев. Дека прво, истиот е јавна личност, нешто што во тужбата, но и неговиот адвокат во подготвителното рочиште тврдеше дека не е. Имено, Вице Заев кажа дека не е јавна личност и дека нема давано изјави во медиуми. Од моја страна беа презентирани негови интервјуа во медиуми и со самото тоа, господинот Вице Заев призна дека е јавна личност. Кога сте јавна личност, мора да сте подготвите да трпите повисоко ниво на критики, и кога нешто ќе биде кажано за вас, имате два начини да одговорите, да го потврдите или да го демантирате, ама никако да се тужите во суд, изјави денеска потпретседателот на ВМРО-ДПМНЕ, Александар Николоски по денешното рочиште.
-Втора работа која што се утврди денес во ова рочиште е дека истиот е сопственик на повеќе компании од она што е познато во јавноста. Имено самиот кажа дека е сопственик на две компаниии, за после тоа самиот да се демантира за да каже дека е сопственик на неколку компании, ама таму имал по, како што самиот карикираше, 20 и нешто проценти, што повторно го прави сопственик, рече Николоски.
Третата работа која што се констатираше денес, подвлече Николоски, е дека Вице Заев добил за само 40 квадрати, стан, земјиште, кое што е во вредност од 2 милијарди денари.
– Значи, написите кои вие денес ги пишувавте, тој денес ги потврди. Потоа, потврди за некои негови бизнис партнери, за кои што се споменуваше во минатото. Потврди дека тој лично, и неговото потесно и пошироко семејство е дел од бизнисот со одгледување на медицинска марихуана, потврди дека е дел од бизнисот градежен, и и исто така, потврди дека неговите компании имаат раст во изминатите години, што мене ми дава право да заклучам дека станува главен бизнис фактор во државата, рече Николоски.
Тој заклучи дека со денешното рочиште и распитот на Вице се потврдиле сите наводи кои што тој ги има кажано во тоа телефонско јавување и со самото тоа смета дека судот треба да го ослободи од вина на следните рочишта.
