Честит 23 Октомври – Денот на македонската револуционерна борба!
На 23 октомври 1893 година, во Солун, шестмина македонски дејци ги поставиле темелите на Македонската револуционерна организација. Во време на туѓа власт и неизвесност, ја презеле одговорноста да го организираат својот народ во борбата за слобода, свесни за опасностите и жртвите што ги очекувале.
Со длабока почит се поклонуваме пред основачите:
– Д-р Христо Татарчев, лекар од Ресен;
– Даме Груев, учител од Смилево, Битолско;
– Петар Поп Арсов, учител од Богомила, Велешко;
– Иван Хаџи Николов, книжар во Солун, родум од Кукуш;
– Антон Димитров, учител од Ајватово, Солунско;
– Христо Батанџиев, учител од Гуменџа, Ениџевардарско.
Шестмина луѓе, една верба и една голема цел – слободна Македонија.
Нивното дело прераснало во движење што го подготвило Илинденското востание во 1903 година и создавањето на Крушевската Република – светол симбол на стремежот за правда и сопствена држава.
Илинденскиот идеал го носеле борците, го чувале семејствата и го пренесувале мајките преку песните и споменот на оние што не се вратиле дома. Преку Народноослободителната војна и АСНОМ биле поставени темелите на современата македонска државност, а на референдумот на 8 септември 1991 година граѓаните ја потврдиле определбата за суверена и самостојна Република Македонија.
Зад овие историски чекори стојат човечки судбини: жртвувана младост, непреболени разделби и надеж дека идните поколенија ќе живеат слободно, во своја држава.
Како ветерани на ВМРО-ДПМНЕ, партијата основана во 1990 година, со гордост го паметиме нашето учество во обновувањето на политичкиот плурализам и во борбата за независност. Тоа искуство нè обврзува и денес, со збор и со личен пример, да ѝ служиме на татковината.
Почитта кон претходните поколенија ја потврдуваме со зачувување на суверенитетот, македонското име, јазикот, идентитетот и историското паметење. Со чесна работа, грижа за сограѓаните и одговорни одлуки треба да изградиме држава што на нашите деца и внуци ќе им понуди достоинствен живот.
Во пресудните прашања за Македонија, да имаме мудрост да се слушнеме и сила да застанеме заедно.
Посебен братски поздрав им упатуваме на Македонците во Егејскиот и Пиринскиот дел на Македонија, во Мала Преспа, Голо Брдо и Гора, како и во дијаспората. Вашата истрајност во негувањето на мајчиниот јазик, обичаите и семејните преданија го одржува македонскиот корен и заслужува длабока почит.
На младите им порачуваме: учете ја историјата на својот народ, сакајте ја татковината и вложувајте го знаењето во нејзиниот напредок. Вашата смелост, труд и успеси ја создаваат нејзината иднина.
Унијата на ветерани на ВМРО-ДПМНЕ им го честита 23 Октомври на сите граѓани на Република Македонија, без разлика на нивната национална и верска припадност.
Да го празнуваме со меѓусебна почит и со решеност да придонесеме за праведна и напредна Македонија – заеднички дом на сите нејзини граѓани.
Нека е вечен споменот на основачите и на сите борци за македонската слобода!
Да живее Република Македонија!
Унија на ветерани на ВМРО-ДПМНЕ
