Преписот на една од најпочитуваните православни икони трајно ќе остане во храмот „Свети Димитрија“ во Ново Село како духовен благослов за градот и верниците
Штип денеска беше исполнет со молитва, духовна радост и свечена атмосфера по повод пристигнувањето на преписот на чудотворната икона на Пресвета Богородица Троеручица од Света Гора.
Во присуство на голем број верници, свештенослужители и гости, иконата беше свечено пречекана пред храмот „Свети Никола“, каде што беше отслужена света литургија. Преписот на чудотворната икона во Штип го донесоа монасите од светогорскиот манастир Хиландар, носејќи благослов од едно од најзначајните духовни средишта на православниот свет.
По свечениот пречек, низ улиците на градот беше организирана литија во која учествуваа бројни верници, следејќи ја иконата во молитвено и достоинствено расположение. Поворката заврши во храмот „Свети Димитрија“ во населбата Ново Село, каде што иконата беше внесена за поклонение.
Од Брегалничката епархија информираа дека преписот на Пресвета Богородица Троеручица трајно ќе остане во Штип. Верниците ќе имаат можност секојдневно да се поклонуваат пред светата икона и да ги упатуваат своите молитви за здравје, мир, благослов и духовно укрепување.
Иконата Троеручица има посебно место во православната традиција и е една од најпочитуваните свети икони во православниот свет. Нејзиното пристигнување во Штип претставува значаен духовен настан за градот, Брегалничката епархија и за сите православни верници во Македонија.