ВМРО-ДПМНЕ порачува дека е подготвена за дијалог за Изборниот законик, но бара правото на глас на македонската дијаспора да се прошири и унапреди, преку гласање по пошта или електронски.
Демократското право на глас на иселениците не смее да биде жртва на дневнополитички калкулации
Јавноста во Македонија е сведок на целосна конфузија предизвикана од опозициските партии СДС, Левица и ДУИ, се наведува во соопштението на ВМРО-ДПМНЕ.
Од партијата посочуваат дека опозициските партии најпрво седнуваат и се договараат за Изборниот законик, а веќе следниот ден го блокираат истиот закон за кој претходно бил постигнат договор.
„Во јавноста пласираат одредени тези, а зад затворени врати, всушност, преговарале и преговараат за сосема други прашања“, се вели во соопштението.
Според ВМРО-ДПМНЕ, наместо опозицијата да учествува во носење закон со кој ќе се зголемат демократските права и ќе се овозможи полесно остварување на уставно загарантираното право на глас, таа покажува намера за враќање назад и за намалување на правото на глас на дијаспората.
„Како ВМРО-ДПМНЕ им порачуваме на СДС, Левица и ДУИ, како што се договорија да го блокираат законот, така да седнат и да се договорат што сакаат од Изборниот законик. Како владејачко мнозинство ќе прифатиме сè што ќе побараат, само да се прошири и унапреди правото на глас и дијаспората да може да гласа по пошта или електронски“, се наведува во соопштението.
Од партијата додаваат дека опозициските партии најпрво треба да изградат заеднички став меѓу себе – дали сакаат една изборна единица, каков модел на финансирање предлагаат, кој начин за поплаки го сметаат за прифатлив, како и кој модел за изјаснување на дијаспората го поддржуваат.
ВМРО-ДПМНЕ нагласува дека нема проблем да разговара за секое прашање што е важно за унапредување на политичкиот систем, продолжување на реформите, европската интеграција на државата и интересите на сите граѓани, без разлика каде се наоѓаат.
„Нашата определба е разговор и дијалог, а не блокади. Сè она за што ќе се договорат овие опозициски партии и ќе го понудат до нас, ние ќе го прифатиме. Демократското право на глас на македонските иселеници и Изборниот законик воопшто не смеат да бидат жртви на дневнополитички калкулации“, стои во соопштението.
Од ВМРО-ДПМНЕ порачуваат дека партијата е подготвена веднаш да седне на маса и да разговара во интерес на државата и на сите нејзини граѓани, доколку СДС, Левица и ДУИ изградат единствен став и покажат искрена волја за договор.
