Македонска Нација
Фондот на холокаустот на Евреите од Македонија домаќин на интернационална група студенти од европски универзитети
Фондот на холокаустот на Евреите од Македонија (ФХЕМ) беше домаќин на интернационална група студенти од престижните европски универзитети Sciences Po, Humboldt University of Berlin, Универзитет „Св. Кирил и Методиј“ и New Bulgarian University.
Студентите присуствуваа на предавање посветено на холокаустот на македонските Евреи и значењето на зачувувањето на историската вистина.
Во фокусот на предавањето беа современите предизвици поврзани со историскиот ревизионизам и искривувањето на вистината за депортацијата и холокаустот на македонските Евреи, во контекст на добрососедските односи, евроинтегративниот процес на Македонија и францускиот предлог за членство во Европската Унија, за кој беше посочено дека отвора простор за ревизионистички толкувања на историските настани.
Во рамки на посетата беше нагласена важноста од зачувување на историските факти, почитувањето на жртвите од холокаустот и спротивставувањето на сите форми на негирање и ревизија на историјата.
Фондот на холокаустот на Евреите од Македонија останува посветен на едукацијата на младите генерации, развојот на меѓународната соработка и заштитата на историската вистина како трајна вредност и обврска кон идните генерации.
