Рубин Земон во друштво на Виктор Стојанов кој ја негира Македонија
Фотографијата на која членот на Извршниот одбор на СДС, Рубин Земон, е во друштво на бугарскиот активист Виктор Стојанов – човек кој јавно го негира македонскиот идентитет и против кого во Македонија се води кривична постапка – претставува јасен показател со какви структури соработуваат Венко Филипче и раководството на СДС.
Оваа фотографија дополнително ја потврдува поврзаноста на СДС со кругови кои отворено дејствуваат спротивно на македонските национални интереси.
Венко Филипче во континуитет е најгласен во одбрана на бугарските позиции во Македонија. Тој јавно ги промовира ставовите на официјална Софија и има идентичен пристап кон уставните измени како и бугарските власти предводени од Румен Радев.
Виктор Стојанов со години промовира националистички тези дека Македонците се дел од бугарскиот народ. Тој е познат по кампањата со која нудеше по 300 евра за промена на презимињата од „-ски“ во „-ов“ или „-ев“, како и по дистрибуцијата на книгите на браќата Миладинови со бугарски предзнак.
Стојанов поставуваше налепници низ Скопје и други градови со споени македонско и бугарско знаме и пораки дека „сме еден народ“. Дополнително, реализираше активности и во Албанија, со обиди Македонците таму да ги претставува како Бугари.
Во исто време, Филипче и луѓе од најтесниот круг на СДС, меѓу кои и Земон, јавно шират ставови со кои се омаловажуваат македонските револуционери, се релативизира македонската историја и се промовираат тези дека Македонија и Бугарија се „еден народ“.
Тоа не е политички став, туку директен удар врз темелите на македонската државност и национален идентитет.
Според информации од партиски извори, на Филипче му било сугерирано да го тргне Земон од Извршниот одбор на СДС за да се намали штетата врз угледот на партијата, но истовремено да продолжи нивната меѓусебна координација и политичка агенда.
Додека македонскиот народ бара цврста заштита на идентитетот, јазикот и историјата, Филипче и неговите соработници, според критичарите, водат политика на сервилност и потчинување кон бугарските позиции.
Зад реториката за „европска иднина“, според нивните политички опоненти, се крие подготвеност за нови национални отстапки и постепено редефинирање на македонскиот идентитет.
Внесувањето на Бугарите во Уставот, според овие оценки, не е последно барање, туку почеток на нова серија условувања поврзани со македонскиот јазик, историја и култура.
ВМРО-ДПМНЕ порача дека ќе се спротивстави на секој обид за редефинирање на македонскиот идентитет и на секоја соработка со структури кои работат спротивно на интересите на Македонија и македонскиот народ.
„Македонија мора да остане достоинствена, суверена и национално исправена држава“, се наведува во реакцијата.
