По резултатите од првиот јавен повик за поддршка на општините, Владата го распиша и вториот повик, со цел продолжување на инвестицискиот циклус и подобрување на условите за живот на граѓаните, истакна Коцевски.
Преку двата јавни повика, Владата им стави на располагање на единиците на локалната самоуправа вкупно 18 милијарди и 449 милиони денари од унгарскиот кредит. Средствата се наменети за реализација на инфраструктурни и капитални проекти од непосредно значење за граѓаните.
Ова претставува сериозна финансиска можност за општините, но уште поважно е што покажува дека поддршката на локалната самоуправа не е еднократна мерка или краткорочна политика.
Станува збор за воспоставен модел преку кој државата, со децентрализација на средства од централниот буџет, обезбедува финансиска поддршка за општините. Локалните самоуправи ги подготвуваат и предлагаат проектите според реалните потреби на граѓаните, а крајната цел е подобра инфраструктура и поквалитетни услови за живот.
Ова е особено значајно за помалите општини, кои имаат сериозни инфраструктурни потреби, но честопати немаат доволно финансиски капацитет самостојно да реализираат поголеми капитални инвестиции. Затоа улогата на државата е да помогне таму каде што е најпотребно и да создаде услови за порамномерен развој на целата територија на Македонија.
Со поддршка на Владата, во Гази Баба се инвестира во детска градинка во Инџиково и во спортска сала во основното училиште во Црешево, со што се создаваат подобри услови за најмладите.
Во Центар се реконструира спортската сала „Работнички“, во Бутел се уредува и заштитува речното корито на Серава, а во Чаир се гради водоводна и атмосферска канализациска мрежа во населбата „Дижонска“.
Во Гевгелија се реконструира Старата чаршија, што е значајно за зачувување на локалното културно наследство и за развојот на градот, додека во Аеродром се уредува јавната површина зад трговскиот центар „Капитол“.
Во Охрид се гради катна гаража, со која треба да се решава деценискиот проблем со недостигот од паркинг-места во туристичкиот бисер. Во Ресен се реконструираат улици и се градат пешачки патеки, додека Кавадарци доби нов и модерен базен.
Општина Ѓорче Петров со владините средства ќе гради нова детска градинка, а во Тетово ќе се градат водоводна мрежа во населбата Вонвардарска и ново средно училиште. Во Демир Капија ќе се реконструира фудбалско игралиште и ќе се гради нов тениски терен.
Виница доби средства за партерно уредување на просторот кај градскиот пазар, Конче за поставување фотонапонска централа на покривот на општинската зграда, а Куманово за изградба на краци од секундарната гасоводна мрежа на неколку улици.
Токму ваквите инвестиции имаат најдиректен ефект врз секојдневниот живот на граѓаните, бидејќи тие секојдневно ги користат улиците, училиштата, јавните установи и комуналната инфраструктура.
Затоа е важно јавните средства, вклучително и средствата од унгарскиот кредит, да бидат насочени кон решавање на проблемите со кои граѓаните секојдневно се соочуваат.
Политиката на Владата предводена од ВМРО-ДПМНЕ е развојот да не биде концентриран само во најголемите градови, туку секоја општина да добие можност да напредува, да инвестира и да ги решава проблемите што со години останувале нерешени, порача Коцевски.
