Премиерот Христијан Мицкоски изјави дека Владата е многу блиску до донесување одлука хидроенергетските проекти „Чебрен“ и „Галиште“ да се реализираат со домашни капацитети, без вклучување на странски концесионери или партнери.
Според него, по повеќедецениските неуспешни обиди за избор на стратешки инвеститор, државата располага со доволно аргументи и анализи за самостојно да пристапи кон реализација на двата капитални енергетски проекти.
„Многу сме блиску до одлука сами да ги градиме Чебрен и Галиште. Тоа би било историски чекор за македонската енергетика и за долгорочната енергетска стабилност на државата“, истакна Мицкоски.
Хидроцентралите „Чебрен“ и „Галиште“ на реката Црна со децении се сметаат за едни од најзначајните неискористени енергетски потенцијали во Македонија. Нивната изградба би овозможила зголемување на производството на електрична енергија, подобро управување со водните ресурси и поголема сигурност на електроенергетскиот систем.
Изјавата на премиерот доаѓа во период кога Владата најавува засилени инвестиции во енергетиката и поставува амбициозна цел Македонија до крајот на годината за првпат по подолг период да стане нето-извозник на електрична енергија.
Доколку биде донесена конечната одлука, проектот „Чебрен – Галиште“ ќе претставува една од најголемите инфраструктурни и енергетски инвестиции во поновата македонска историја.