ВМРО-ДПМНЕ порача дека ќе прифати договор на опозицијата доколку се обезбеди право на гласање на дијаспората по електронски пат или по пошта и повика на политички дијалог наместо блокади.
Портпаролот на ВМРО-ДПМНЕ, Манасиевски, порача дека СДС, Левица и ДУИ најнапред треба да изградат заеднички став околу измените на Изборниот законик, по што владејачката партија е подготвена да разговара за сите предложени решенија.
„СДС, Левица и ДУИ прво нека се договорат меѓу себе што сакаат од Изборниот законик, а ВМРО-ДПМНЕ ќе прифати сè што ќе побараат, само дијаспората да може да гласа по електронски пат или по пошта“, истакна Манасиевски.
Според него, македонската јавност е сведок на, како што оцени, целосна политичка конфузија кај СДС, Левица и ДУИ во однос на новиот Изборен законик.
„Не може еден ден да се договараат, а следниот ден да го блокираат истиот закон кој веќе бил договорен. Не може во јавноста да пласираат различни тези, а зад затворени врати да преговараат за сосема други прашања“, нагласи Манасиевски.
Тој ги повика опозициските партии најпрво да постигнат меѓусебен договор за клучните прашања поврзани со изборните правила.
„Да седнат и да се договорат за една изборна единица, за моделот на финансирање, за постапката по приговорите и начинот на кој тие би биле прифатливи, како и за моделот на изјаснување на дијаспората. Сето она што овие опозициски партии ќе го понудат, ние ќе го прифатиме“, рече тој.
Манасиевски потенцираше дека ВМРО-ДПМНЕ нема проблем да разговара за секое прашање што е важно за унапредување на политичкиот систем, продолжување на реформите, европската интеграција на државата и интересите на сите граѓани.
„Нашата определба е дијалог, а не блокади“, порача тој.
Според Манасиевски, Изборниот законик не смее да стане жртва на дневнополитички калкулации.
„Доколку СДС, Левица и ДУИ изградат единствен став и покажат искрена волја за договор, ВМРО-ДПМНЕ е подготвено веднаш да седне на маса и да разговара во интерес на државата и на сите нејзини граѓани“, истакна Манасиевски.
