Координаторот на пратеничката група на ВМРО-ДПМНЕ тврди дека јавноста не била информирана за резултатите и побара Јавното обвинителство веднаш да го испита случајот
Речиси 400 испитувања на водата, направени во периодот кога Венко Филипче бил министер за здравство, покажале дека таа била неисправна, но тогашната власт не ги информирала граѓаните, изјави на денешната прес-конференција Никола Мицевски, член на Извршниот комитет и координатор на пратеничката група на ВМРО-ДПМНЕ.
Според Мицевски, надлежните институции не презеле соодветни мерки и ги сокриле податоците од јавноста.
„Со Филипче како министер водата била неисправна, а тоа се криело од граѓаните. Речиси 400 испитувања на водата, во периодот кога Венко Филипче беше министер за здравство и СДС беше на власт, покажале дека граѓаните пиеле неисправна вода“, рече Мицевски.
Тој обвини дека Филипче и СДС, поради политички интереси, не ја информирале јавноста за опасноста.
На прес-конференцијата Мицевски издвои неколку случаи за кои, како што посочи, постои документација:
- На 19 мај 2021 година, испитувањето на водата од Водостопанство „Лисиче“ во Велес покажало дека таа не одговара на одредбите од Правилникот за безбедност и квалитет на водата за пиење.
- На 22 јуни 2021 година, истиот резултат бил утврден и при испитувањето на водата од локалниот водовод во селото Нивичани, Кочанско.
- На 20 јули 2021 година, водата во Пештани, Охридско, не ги исполнувала пропишаните стандарди, по што на 23 јули биле составени записник и решение за забрана.
- На 10 ноември 2021 година, било утврдено дека водата од чешма во училиштето „Страшо Пинџур“ во селото Уларци, Чешиновско, не била во согласност со законските прописи.
- На 11 јануари 2022 година, водата во Здравствениот дом во Делчево не била исправна за пиење.
Мицевски нагласи дека јавноста не била информирана ниту за овие, ниту за многу други случаи.
„Болниците се полнеле, на граѓаните очигледно им било лошо, но никој не знаел од што, додека власта тоа вешто го криела“, изјави тој.
Според Мицевски, за случајот веќе е известено Министерството за внатрешни работи, а релевантната документација треба да биде доставена до Јавното обвинителство.
ВМРО-ДПМНЕ очекува Обвинителството веднаш и без одлагање да постапи, да ги испита сите наводи и, доколку се утврдат пропусти или злоупотреби, да побара одговорност од надлежните лица.
