Премиерот порача дека секоја генерација има свој Илинден, а задачата на денешната е да изгради силна, праведна и просперитетна Македонија во која младите ќе ја гледаат својата иднина
Премиерот Христијан Мицкоски, во своето обраќање во Меморијалниот центар АСНОМ во Пелинце по повод 2 Август – Илинден, порача дека никогаш нема да се откаже од борбата Македонија да стане подобро место за живеење и дека нема да прифати отстапки на штета на државните и националните интереси.
„Никогаш нема да се откажам од борбата да ја направиме Македонија подобро место за живеење – наш дом и наша иднина. Никогаш нема да го прифатам нивното однесување на отстапки кон прашањата што се блокада на нашиот пат кон ЕУ и никогаш нема да го разочарам народот. Јас предавства на штета на државата и народот, како што се правеше во минатото, по ниту една цена нема да направам“, истакна Мицкоски.
Илинден е завет и карактер на македонскиот народ
Премиерот нагласи дека Илинден не е само датум од македонската историја, туку завет и израз на непокорниот карактер на народот.
Според него, двата Илиндена претставуваат една историска целина, бидејќи Крушево и АСНОМ не се две одделни приказни, туку две страници од иста книга, испишана со вера, храброст и одлучност Македонија да биде своја, достоинствена и слободна.
„Во Крушево се роди идејата дека слободата вреди повеќе од животот. На АСНОМ, недалеку од ова место, во манастирот ‘Св. Прохор Пчињски’, таа идеја доби своја државотворна форма“, рече Мицкоски.
Тој ги издвои претседателот на Крушевската Република, Никола Карев, и првиот претседател на Президиумот на АСНОМ, Методија Андонов-Ченто, како две значајни личности што ги предводеле овие државотворни процеси.
Мицкоски потсети дека делегатите на Првото заседание на АСНОМ од 2 август 1944 година темелот за изградбата на македонската држава го пронашле во Илинденското востание од 1903 година и во борбата на македонските комити и војводи за слободна и автономна Македонија.
Посочи и дека со Декларацијата за основните права на граѓаните биле утврдени слободата на говорот и вероисповедта, правото на национална припадност, движење и приватна сопственост, како и правото на глас на жените.
Секоја генерација има свој Илинден
Премиерот оцени дека одбележувањето на Илинден не треба да биде само навраќање кон славното минато, туку и повод за преиспитување дали денешните генерации се достојни наследници на жртвата на илинденците и асномците.
„Историјата не бара од нас да ги повторуваме нивните чекори. Историјата бара да ја покажеме истата храброст. Секоја генерација има свој Илинден“, порача Мицкоски.
Според него, задачата на денешната генерација е да ја зачува државата силна, да ја направи просперитетна и праведна и повторно да изгради земја во која граѓаните ќе веруваат дека вреди да се остане, да се работи, да се создава и да се основа семејство.
„Народ што живее само од својата историја полека почнува да ја губи својата иднина. Но, народ што ја почитува својата историја, а храбро ја создава својата иднина, никој не може да го запре“, истакна премиерот.
Битка за довербата, достоинството и надежта
Мицкоски порача дека денес не се води само политичка или економска битка, ниту само борба за нови инвестиции, повисоки плати, подобри училишта, модерни болници и нови патишта. Според него, се води и подлабока битка за духот на народот, вербата во државата и довербата во институциите.
„Нашата генерација има обврска да ја сочува душата, да ја врати вербата во институциите, да го врати достоинството на чесниот човек и повторно да ја направи надежта најсилна движечка сила на нашето општество“, нагласи тој.
Како особено опасна ја посочи состојбата во која еден народ престанува да верува во себе, се помирува со просечноста, се навикнува на неправдата и почнува да го прифаќа поразот како нормална состојба.
Премиерот порача дека државата мора повторно да им припаѓа на граѓаните, законите да важат еднакво за сите, трудот да биде наградуван, знаењето почитувано, а младите својата иднина да ја гледаат во Македонија.
Повик за национално единство
Во завршниот дел од обраќањето Мицкоски повика на обединување околу државните интереси, нагласувајќи дека татковината е поголема од секоја политичка партија, функција, мандат или поединец.
„Никогаш не сме победувале кога сме биле поделени, а секогаш сме победувале кога сме се обединувале околу голема цел. Така било во Крушево, така било на АСНОМ, така мора да биде и денес“, рече премиерот.
Тој порача дека целта е изградба на држава во која институциите ќе бидат посилни од поединците, законот од привилегиите, знаењето од партиската книшка, а успехот ќе биде резултат на труд, а не на врски.
„Немаме право да дозволиме омразата да стане поважна од љубовта кон татковината. Немаме право песимизмот да стане национална идеологија, цинизмот да ја замени визијата и некој да ја убие надежта кај народот“, нагласи Мицкоски.
Обраќањето го заврши со порака дека Македонија ќе остане исправена, обединета, достоинствена и непокорна и дека никогаш нема да отстапи од идеалите на Илинден и АСНОМ.
„Нека живее вечниот дух на Илинден! Нека живее државотворната мисла на АСНОМ! Нека живее нашата единствена татковина! Бог да ја благослови Македонија!“, порача премиерот Мицкоски.
