Владата предводена од ВМРО-ДПМНЕ во изминатите шест квартали обезбеди економски раст од над 3 проценти, додека паралелно платите растат со динамика близу 10 проценти, се зголемува бројот на нововработени лица, а невработеноста е на историски најниско ниво.
Истовремено, Владата успешно се справува со предизвикот да го финансира развојот на економијата и паралелно да ги сервисира старите долгови создадени токму во периодот кога СДС беше на власт.
Минатата година беше отплатена еврообврзница во вредност од 500 милиони евра, а оваа година за отплата е еврообврзница од 700 милиони евра, исто така земена од владите на СДС. Половина од оваа обврска веќе е сервисирана, додека остатокот ќе биде исплатен во текот на јуни 2026 година.
Во периодот од 2026 до 2031 година државата има обврска да сервисира околу 9 милијарди евра по основ на главнина и камати од старите долгови. Само од втората половина на 2024 година до првиот квартал на 2026 година беа обезбедени 1,2 милијарди евра исклучиво за сервисирање на еврообврзници земени од претходната власт.
Капиталните инвестиции денес се реализираат на историски високо ниво, за разлика од периодот кога СДС беше на власт, кога се плаќаа аванси и анекси, а на терен немаше реализација и конкретни резултати.
Поради лошото менаџирање на државата од страна на СДС, денес државата враќа 50 милиони евра на 156 компании по основ на мерката „солидарен данок“.
Пред Фатмир Битиќи повторно да држи лекции за економија, потребно е да се потсетат и тој и граѓаните дека СДС во периодот од 2017 година до вториот квартал на 2024 година го зголеми јавниот долг за 4,78 милијарди евра, односно двојно ја задолжи државата. Притоа, економскиот раст во просек изнесуваше само 1,8 проценти, платите растеа околу 5 проценти, а инфлацијата достигна 14 проценти.
Разликата меѓу ВМРО-ДПМНЕ и СДС во делот на економијата е повеќе од јасна. Граѓаните на изборите ги казнија лошите економски политики на СДС, политики што ги осиромашија граѓаните и доведоа до ситуација луѓето да преживуваат со 150 денари дневно.
