Партиските калкулации повторно ги ставија пред интересите на граѓаните, реформите и можностите што ги нуди Планот за раст
Недонесувањето на Изборниот законик е уште еден доказ дека СДС, Левица и ДУИ, наместо да придонесуваат за напредокот на државата, избираат блокади, опструкции и политички игри на штета на граѓаните.
Усвојувањето на законот беше потребно за усогласување на изборното законодавство со препораките на ОБСЕ/ОДИХР, за исполнување на обврските од Реформската агенда и за обезбедување дополнителен напредок и конкретни придобивки за граѓаните.
Македонија успешно реализираше девет од предвидените десет реформи од Реформската агенда. Единствената преостаната пречка е токму блокадата на Изборниот законик, предводена од СДС, Левица и ДУИ.
Нивното однесување покажува дека кога имаат можност да придонесат за државните интереси, тие избираат опструкции и политички калкулации. За нив поважна е партиската стратегија отколку напредокот на Македонија, спроведувањето на реформите и придобивките што треба да ги добијат граѓаните.
Граѓаните треба да знаат кој ги кочи реформите, кој го попречува развојот и кој работи спротивно на државните интереси. Пропуштената можност за навремено усвојување на Изборниот законик не е само политички неуспех. Таа создава и ризик Македонија да изгуби дополнителни средства, поддршка и развојни можности предвидени со Планот за раст.
Додека СДС, Левица и ДУИ јавно зборуваат за европски вредности и реформи, нивните постапки покажуваат нешто сосема друго. Кога требаше конкретно да придонесат, тие ги ставија партиските интереси пред интересите на Македонија и нејзините граѓани.
