ВМРО-ДПМНЕ оди на убедлива победа – за подобра, поразвиена и успешна Брвеница!
ВМРО-ДПМНЕ го избра Стојанчо Радичевски за кандидат за градоначалник на Општина Брвеница на претстојните вонредни локални избори. Од партијата очекуваат обединување и широка поддршка за кандидатурата, со порака дека Брвеница заслужува чесно, одговорно и посветено раководење.
На редовна седница на Извршниот комитет на ВМРО-ДПМНЕ, едногласно беше избран Стојанчо Радичевски за кандидат за градоначалник на Општина Брвеница на претстојните вонредни локални избори.
Радичевски е актуелен претседател на Општинскиот комитет на ВМРО-ДПМНЕ во Брвеница и човек кој добро ги познава потребите, проблемите и предизвиците со кои секојдневно се соочуваат жителите на општината.
Тој дипломирал на Правниот факултет „Јустинијан Први“, а своето образование го продолжил со постдипломски студии и се стекнал со звање магистер по граѓанско право.
Со кандидатурата на Радичевски, ВМРО-ДПМНЕ влегува во изборната трка со определба за одговорно управување, реализација на конкретни проекти и создавање подобри услови за живот во сите населени места во Општина Брвеница.
Од партијата очекуваат обединување на сите прогресивни сили и широка поддршка за кандидат кој, како што посочуваат, претставува чесно, искрено и одговорно решение за напредокот и иднината на Брвеница.
Претстојните вонредни локални избори ќе бидат можност граѓаните да изберат каква Брвеница сакаат – општина која ќе се развива, ќе ги решава секојдневните проблеми и ќе создава перспектива за младите и идните генерации.
