Пратеничката од ВМРО-ДПМНЕ, Дафина Стојаноска, на денешната собраниска седница оцени дека интерпелацијата поднесена против министерот за земјоделство, шумарство и водостопанство Цветан Трипуновски е неоснована и неиздржана, нагласувајќи дека министерот со факти и аргументи ги побил сите обвинувања изнесени против него.
Стојаноска направи споредба меѓу резултатите од двегодишното работење на Трипуновски и работењето на неговиот претходник Љупчо Николовски, истакнувајќи дека актуелниот министер презел конкретни чекори за расчистување на неправилностите и злоупотребите во ресорот.
„Раст на извозот на земјоделски производи за 25 проценти во 2025 година во однос на 2024 година, позитивен трговски биланс од 215 милиони евра меѓу извозот и увозот на земјоделски производи, како и зголемување на откупот и продажбата за 15 проценти во четвртото тримесечје од 2025 година во споредба со истиот период претходната година. Обезбедени се 250 милиони денари за Македонски шуми и 100 милиони денари за Водостопанство“, истакна Стојаноска.
Таа посочи дека се воведени построги критериуми во Програмата за финансиска поддршка во земјоделството за 2026 година, со цел средствата да се распределуваат наменски и транспарентно.
Според неа, склучени се 57 договори за набавка на специјални комбајни за жнеење ориз, започнала нова дигитална ера во македонското шумарство, а значително е зголемен и интересот за мерките за поддршка на младите земјоделци.
„На јавниот повик за млад земјоделец пристигнаа 254 апликации, а беа одобрени 117. За споредба, во 2023 година биле поднесени 44 барања, а исплатени само 18. Дополнително, шумските полицајци добија бенефициран стаж, односно за 12 ефективни месеци ќе им се пресметуваат 16 месеци стаж“, рече Стојаноска.
Во своето обраќање таа се осврна и на, како што наведе, низа злоупотреби и скандали откриени во периодот кога со Министерството раководел Љупчо Николовски. Стојаноска ги спомена случаите со отписот на околу 2.000 тони јачмен и пченица од државните стокови резерви, заобиколувањето на Платежната агенција при распределба на грантови за т.н. мали семејни винарии, како и незаконски договори за земјоделско земјиште вредни стотици илјади евра.
Стојаноска нагласи дека суштинската разлика меѓу актуелното и поранешното раководство на Министерството за земјоделство е во односот кон откриените злоупотреби и начинот на кој институциите реагираат.
„Разликата е што денес се отвораат случаите за кои порано се молчеше. Наместо заташкување, институциите постапуваат, а граѓаните конечно добиваат увид во начинот на кој се трошеле државните средства“, истакна Стојаноска.
Таа порача дека јавноста има право да знае каде завршувале парите на граѓаните и дека секој што ја злоупотребил функцијата треба да одговара пред надлежните институции, додавајќи дека токму затоа СДС нема кредибилитет да зборува за отчетност и одговорно управување со земјоделскиот сектор.
Според Стојаноска, интерпелацијата е обид СДС да избега од сопственото политичко наследство во земјоделството и да ја префрли дебатата од скандалите што се отворија во јавноста. Таа оцени дека наместо аргументи за наводите во интерпелацијата, опозицијата избегнува да одговори на прашањата поврзани со состојбите што ги оставила зад себе во ресорот и се обидува политички да ја дефокусира јавноста.
„Фактите и бројките презентирани од министерот Трипуновски јасно покажуваат дека интерпелацијата нема реална основа. Граѓаните можат јасно да ја видат разликата меѓу периодот на скандали и сомнежи за злоупотреби и периодот во кој се реализираат проекти, се зголемува поддршката за земјоделците и се бара одговорност за секој утврден пропуст“, истакна Стојаноска.
Таа потсети и на случајот со кредитот од 80 милиони евра од КФВ банката наменет за инвестиции во водостопанството.
„Државата исплатила 2,2 милиони евра само по основ на камати, бидејќи пет години не биле преземени потребните активности по склучувањето на договорот. Тоа значи дека СДС имале втор Груби, но во Министерството за земјоделство“, порача Стојаноска.
