Пратеникот од ВМРО-ДПМНЕ, Бојан Стојаноски, во емисијата „Став на регионот“ на телевизија Њузмакс Балканс истакна дека Владата продолжува со економска политика насочена кон силни капитални инвестиции, поддршка на стопанството и развој на инфраструктурата, со цел зголемување на бруто-домашниот производ и економски раст.
Стојаноски посочи дека 260 милиони евра кои Република Македонија ќе ги повлече ќе бидат наменети за финансирање капитални проекти што се реализираат преку централниот буџет.
„Кога ја презедовме власта кажавме дека нашата економска филозофија ќе почива на неколку столбови, од кои едниот е силен буст на капиталните инвестиции, преку градежништвото да го покачиме бруто-домашниот производ, нешто што веќе се гледа дека дава резултати“, истакна Стојаноски.
Тој нагласи дека државата годинава има обврска да врати 2,6 милијарди евра стари долгови, што претставува третина од буџетот, но и покрај тоа, како што рече, обезбедени се средства за повисоки плати, пензии и реализација на инфраструктурни проекти.
„И покрај обврските за враќање на старите долгови, успеваме да обезбедиме средства за повисоки плати, повисоки пензии, реконструкција на инфраструктурата и реализација на капитални инвестиции. Просечната пензија за две години е зголемена за 32 проценти, а сите пензионери добија покачување од 7.000 денари. Просечната нето-плата е зголемена за 15,5 проценти, односно за околу 6.500 денари, а се бележат и 17.700 новоотворени работни места“, изјави Стојаноски.
Тој додаде дека преку унгарскиот финансиски пакет, како и преку буџетот на Министерството за транспорт, се финансираат бројни проекти во општините, насочени кон подобрување на секојдневниот живот на граѓаните.
Како дел од инфраструктурните активности, Стојаноски ги посочи подготовките за железничката пруга на Коридорот 10, како и изградбата на автопатот Прилеп-Битола, оценувајќи дека проектите се реализираат со задоволително темпо.
„Кога ќе се соберат сите овие проекти, станува збор за инвестиции вредни неколку милијарди евра. Нашата економска филозофија е едноставна – капитални инвестиции, привлекување странски директни инвестиции и помош за македонското стопанство. Тоа ни обезбедува економски раст од 3,5 проценти шест квартали по ред, што ја рангира Македонија меѓу водечките европски економии по квартален раст“, истакна Стојаноски.