Претставници на Еврејската заедница и на Фондот на холокаустот на Евреите од Македонија – го предадоа Светиот крст во храмот „Света Огнена Марина“.
Светиот Крст беше пречекан од голем број верници, жители на Зубовце, гости од соседните села и пријатели од цела Македонија.
Зубовце денес живее во знакот на верата, традицијата и македонското заедништво.
На овој возвишен духовен настан присуствуваа Поглаварот на Македонската Православна Црква – Охридска Архиепископија, Архиепископот Охридски и Македонски г. г. Стефан, Митрополитот Тетовско-Гостиварски г. Јосиф, како и бројни Свештенослужители.
Црковните великодостојници беа пречекани на традиционален православен начин, со леб и сол и со искрени желби за здравје, среќа и благослов за жителите на Зубовце, соседните села и цела Македонија.
По свечениот пречек следуваше богослужба, при што беа испеани и две обредни погачи, подготвени од годинашните кумови. Во секоја од погачите беше ставена по една паричка, а по завршувањето на црковниот чин тие беа поделени меѓу присутните. Според традицијата, верниците кај кои ќе паднат паричките ја преземаат честа и обврската да бидат кумови на празникот Марена следната година.
Светиот крст ќе остане трајно духовно богатство во црквата „Света Огнена Марина“ и благослов за сите верници што ќе доаѓаат да му се поклонат.
По завршувањето на црковниот чин започна музичка прослава, а пред присутните настапи играорната група на КУД „Браќа Ѓиноски“ од Гостивар. Со македонски песни и ора, играорците дополнително ја збогатија свечената и празнична атмосфера.
Добрите домаќини за гостите приредија традиционална трпеза со грав и сланина и сезонска туршија, во Зубовце позната како „туршија за три дена“.
Денешната прослава на Марена уште еднаш ги обедини верата, традицијата и македонското културно наследство, претворајќи го Зубовце во место на молитва, радост и заедништво.
