СОЈУЗ НА МАКЕДОНЦИТЕ ОД ЕГЕЈОТ МАКЕДОН
13 КОНЦЕРТ “ПЕСНИ И ОРА ОД ЕГЕЈОТ“
8 октомври 2017 година, Скопје, Македонија
– Вчера во Домот на АРМ се одржа 13 традиционален концерт “Песни и ора од Егејот“ во организација на Сојузот на Македонците од Егејот МАКЕДОН и Здружението за духовно обединување на Сетинци, Попадинци и Крушоради од Лерин во Македонија.
На концертот водител на програмата беше Сашо Голов, песни и ора изведоа членовите на Културно-уметничкото друштво “Никола Јонков Вапцаров“ од Скопје, со македонски народни песни пред публиката се претставија Ирена Спасовска и Ани Малинкова, а рецитираше Перо Цаца.
Присутните ги поздрави претседателот на Сојузот на Македонците од Егејот МАКЕДОН Ташко Јованов, кој во името на организаторите на Концертот подели признанија и плакети на поединци и организации што го помогнаа одржувањето на Концертот.
Присутните бурно го поздравија присуството на делегација на Македонците од Куфалово и Солун и делегација на кабинетот на Претседателот на Република Македонија проф.д-р Ѓорге Иванов.
На Концертот присуствуваа и беа поздравени претседателот на Светскиот Македонски Конгрес Тодор Петров, Македонскиот сенатор од Стокхолм, Шведска Наќе Туфекчиев, претседателот на здружението на Македонците “Пелагонија“ од Панчево, Србија Душан Јаневски, претседателот на Здружението “Ѕвезда“ од Велес Бошко Божинов, потпретседателот на Здружението “Свети Герман“ од Скопје Ирена Борисовска и претседателот на Здружението “Сонцето од Кутлеш“ Јован Костадинов.
За жал, годинава за првпат во последните 12 години фолклорна група од Егејскиот дел на Македонија не допатува на Концертот, поради притисок од грчките власти и страв од репресија, по најавите од Владата во Атина и Владата на Заев за забрана и санкции за истакнување на шеснаесет-зрачното златно-жолто сонце на црвена основа, којшто претставува симбол на Сојузот на Македонците од Егејот МАКЕДОН и Здружението за духовно обединување на Сетинци, Попадинци и Крушоради од Лерин во Македонија.
Организаторите се надеваат дека на 14 традиционален концерт “Песни и ора од Егејот“ повторно ќе присуствува фолклорна група од Егејскиот дел на Македонија.
Концертот ги исполни срцата на присутните со прекрасните македонски ора и песни!
