Во заедничкиот текст по повод 17 ноември, амбасадорите на Словачка, Чешка, Полска и Унгарија ја поврзуваат 35-годишнината од донесувањето на Уставот на независна Македонија со демократските промени во Централна Европа во 1989 година.
Словачка, Чешка, Полска и Унгарија остануваат поддржувачи на европската интеграција на Македонија и застапници на нејзиното членство во Европската Унија. Ова е пораката на амбасадорите на четирите земји од Вишеградската група (В4), упатена од Скопје во заеднички текст по повод 17 ноември.
За Централна Европа, 17 ноември 1989 година е еден од датумите што ги одбележаа демократските промени и крајот на поделбата на континентот со Железната завеса. Амбасадорите потсетуваат дека движењето „Солидарност“ во Полска го отвори патот за промени во регионот, а изградбата на демократски институции и воспоставувањето доверба меѓу соседите барале години реформи.
За Македонија, истиот датум има посебно значење. На 17 ноември 1991 година беше донесен Уставот на независна Република Македонија, со кој беа поставени темелите на нејзиниот уставен поредок. Според амбасадорите, двете годишнини потсетуваат на значењето на слободата, демократијата и правото на народите сами да ја одредуваат својата иднина.
Европа не е целосна без Западен Балкан
Амбасадорите оценуваат дека безбедноста и просперитетот на Централна Европа се тесно поврзани со стабилноста на Југоисточна Европа. Во тој контекст, тие го посочуваат членството на Македонија во ЕУ како заеднички стратешки интерес на земјата, Вишеградската група и Европа.
Во текстот се осврнуваат и на долгиот европски пат на Македонија, на пречките со кои се соочува и на заморот што го предизвикува долгото чекање. Посочуваат дека напредокот зависи од исполнувањето на договорените услови и дека реформите треба да донесат конкретни придобивки за граѓаните преку доследно владеење на правото, независно судство, модерна економија и повеќе можности за младите.
Четирите земји нудат да го споделат сопственото искуство со реформите и пристапувањето во ЕУ. Амбасадорите изразуваат почит за историските одлуки и жртвите што Македонија ги направи на евроатлантскиот пат и порачуваат дека нивните земји ќе продолжат да ја застапуваат нејзината европска перспектива во Брисел.
„Сакаме да ве увериме дека не сте сами на ова патување“, се наведува во заедничкиот текст.
Амбасадорите на Словачка, Чешка, Полска и Унгарија, доставен од Амбасадата на Република Словачка.