Гордана Димовска
Од врвен фудбалер до успешен фудбалски тренер – тоа е пат исполнет со талент, дисциплина, жртви, искуство и постојана желба за победа. Додека кариерата на теренот бара физичка подготвеност, инстинкт и фудбалска умешност, преминувањето на тренерската клупа носи нови предизвици: тактичко знаење, психолошка зрелост, способност за мотивирање и, пред сè, лидерство.
Таков пат изодел Роб Спасевски, истакнат Македонец од Мелбурн, Австралија, поранешен фудбалер на Престон Македонија, кој по завршувањето на играчката кариера успешно продолжил како тренер.
За него, успешниот тим не се создава само со добри поединци, туку со систем што е приспособен на квалитетите на играчите.
„Успешен тим за мене е оној кој игра според своите силни страни. Прилагодувањето на системот и структурата што го надополнуваат нивото на играчите во тимот е она што секогаш сум се обидувал да го правам, а не обратно. Играчите треба да ги знаат своите улоги и да нема збунетост. Каде што нема збунетост, има самодоверба“, вели Спасевски.
Според него, основата на секој добар тим се играчи кои се подготвени да учат, кои имаат добар карактер и, што е особено важно, победнички менталитет.
Мотивацијата доаѓа однатре
Спасевски има јасен став и кога станува збор за мотивацијата на фудбалерите.
„Како фудбалер, никогаш не сум чекал менаџер или тренер да ме мотивира да играм победнички фудбал. Мислам дека мотивацијата секогаш доаѓа однатре – од вашето семејство, пријателите и најблиските“, вели тој.
Посебно место во неговото размислување имаат луѓето кои верувале во еден млад спортист уште од неговите почетоци, како и жртвите што ги прават родителите и семејството за да му овозможат да го следи својот сон.
„Љубовта кон играта започнува кога како дете си слободен како птица и едноставно играш фудбал. Моментот кога првпат сфаќаш дека си заљубен во фудбалот ги поставува темелите на успешниот спортист.“
Тука се и тешките тренинзи, победите и поразите, подемите и падовите, како и постојаната желба секој ден да се биде подобар.
„Тоа е она што се обидувам да им го всадам и на моите играчи. Сите овие фактори треба да го мотивираат играчот да го даде најдоброто од себе во секоја ситуација“, нагласува Спасевски.
Богата играчка кариера
Роб Спасевски оставил значајна трага во австралискиот фудбал, особено во дресот на Престон Македонија, каде што настапувал во периодот од 1989 до 1995 година.
Во тоа време клубот настапувал во NSL – Националната фудбалска лига, тогаш највисокото ниво на австралискиот фудбал.
Во неговата играчка биографија се запишани бројни признанија и успеси:
- 1989 – добитник на медалот „Вајнштајн“ за најдобар јуниорски играч во Викторија;
- 1989 – член на државниот тим на Викторија и национален младински шампион;
- 1989 – настап на Светското првенство за играчи до 16 години во Шкотска со репрезентацијата на Австралија;
- 1991 – освоено трето место и бронзен медал на натпреварување во Португалија;
- 1991 – сениорски претставник на Викторија;
- 1991 – вицешампион во NSL Cup со Престон Македонија;
- 1991 – победник на Златниот куп со Престон Македонија;
- 1992 – победник на Dockerty Cup со Престон Македонија;
- 1994 – шампион на VPL со Престон Македонија.
23 години тренерско искуство
По богатата играчка кариера, Спасевски своето фудбалско знаење го пренесува на новите генерации. Зад себе има 23 години тренерско искуство, работејќи со женски и машки екипи.
Како тренер работел со женските тимови на Универзитетот во Мелбурн и Престон Лајонс, а во машкиот фудбал бил ангажиран во Лалор Јунајтед Слога, Престон Македонија, Хјум Јунајтед, Алтона Меџик, Олд Скоч СЦ, Бокс Хил, Пленти Вали Лајонс и Мелтон Феникс.
Еден од показателите за неговите тренерски способности е успехот со екипите кои ги преземал во тешки моменти.
„Во текот на моите тренерски ангажмани успеав да спасам четири тима од испаѓање“, вели Спасевски.
Станува збор за Алтона Меџик во 2014 година, Бокс Хил во 2023 година, Пленти Вали во 2025 година и Мелтон Феникс во 2026 година.
Да се преземе екипа која се бори за опстанок значи да се работи под огромен притисок. Потребно е за кратко време да се препознаат слабостите, да се врати самодовербата кај играчите и да се создаде систем што носи резултати. Токму четирите успешни битки за опстанок се значаен дел од тренерското портфолио на Спасевски.
Од Престон Македонија до тренерската клупа
Животната и спортската приказна на Роб Спасевски е уште едно сведоштво за придонесот што Македонците го даваат во австралискиот спорт.
Од млад фудбалер во Престон Македонија, преку настапи на високо национално и меѓународно ниво, до тренер со повеќе од две децении искуство, Спасевски останува поврзан со фудбалот што го засакал уште како дете.
Неговата филозофија е едноставна: тимот треба да биде создаден според квалитетите на играчите, а вистинската мотивација мора да доаѓа однатре.
Талентот може да го отвори патот, но карактерот, дисциплината, семејната поддршка, победничкиот менталитет и желбата постојано да се напредува се оние што го одредуваат успехот.
