Стефо Нанцу добитник на две врвни награди, Душан Ристевски награден за животно дело
Австралиско македонскиот театар од Сиднеј минатата сабота, 28 ноември, во преполнетиот театар на Hurstville Civic Theatre во Hurstville (предградие на Сиднеј) ја одржа својата Гала вечер при што се доделија награди за глума и театарска уметност под името Александар Македонски. Исто така премиерно се изведе монодрамата ЧЕНТО од Душан Ристевски во режија на Стефо Нанцу, а во изведба на Васко Србиновски и Стефо Нанцу.
Со посебна изведба под името Аудиција настапија членови на Театарот, а музичкиот дел беше исполнет со настапи на КУД Илинден, како и познатите музичари Петко Чавкоски, Илија Ампевски и Божин Бојковски настапија со македонски традиционални инструменти кои ја воодушевија публиката. На Гала вечерта присуствуваше и амбасадорот на Република Македонија Веле Трпевски.
Жири комисијата во состав на Тони Радевски (познат режисер на кратки филмови), Радица Бојковска (новинар и продуцент на Радио ЅВЅ), Иван Трпоски (поет и писател) имаа одговорна работа да ги изберат најдобрите глумци во неколкуте категории од изведените драми Ограда и Доктор Жими Мајка. Исто така имаше награда по избор од публиката.
Театарските награди Александар Македонски за глума за 2015 година ги добија следните лица:
Hајдобра машка улога: Стефо Нанцу со улогата на Кевин во Ограда
Најдобра женска улога: Јаворка Котевска со улогата на Петкана во Др. Жими Ϻајка
Најдобра машка придружна улога: Петар Павловски со улогата на Петар во Ограда
Најдобра женска придружна улога: Гордана Милошевска со улогата на Магда во Др. Жими Ϻајка
Најдобар дебитант: Антонио Нешковски со улогата на Тони во Др. Жими Ϻајка
Награда со избор од публиката: Стефо Нанцу со улогата на Кевин во Ограда
Награда за животно дело во театарската уметност: Душан Ристевски. Оваа награда се додели по избор на членовите на Театарот.
Прекрасната изведбата на монодрамата „Ченто“ од врвниот артист Васко Србиновски, а со помош на Стефо Нанцу, не врати во минатото кога првиот претседател на Република Македонија Методија Андонов – Ченто, невино осуден, во затвот Идризово ги одлежуваше деновите во самица. Трогателната слика на Ченто кој сонуваше да ја обедини Македонија, ја расплака публиката. Можам со воодушевување да оценам дека оваа улога за Васко преставуваше една од најпредизвикувачките и најтешките кои тој досега ги има одиграно на сцена. Со оваа престава Театарот го проширува својот репертоар и покажува дека професионално умее да стави на сцена уникатно прекрасни престави.
Водител на вечерта беше Валентина Апостоловска, а сценски директор Никола Апостоловски.
Добро е да се забележи дека покровители на драмското прикажување на „Ченто“ и Гала вечерта беа Др Гордана Цвејоска Стеванс и нејзината стоматолошка ординација Your Smile Centre, Македонското пензионерско друштво од Ферфилд и Прилепското социјално друштво од Сиднеј кои го носат името на Методија Андонов-Ченто.
Иван Трпоски
