Македонска Нација
Секој Македонец е важен: На пописот во Австралија да се изјасниме како Македонци
Македонската заедница се мобилизира пред пописот на 11 август: Целта е официјалната бројка да достигне најмалку 200.000 лица со македонско потекло
„Во графата за потекло напишете ‘македонско’, за земја на потекло ‘Македонија’, за јазикот што го зборувате дома ‘македонски’, а за религија наведете ‘македонско православие’“.
Со вакви апели деновиве бројни македонски организации, црковни општини, активисти и претставници на институциите им се обраќаат на Македонците во Австралија. Целта е на претстојниот попис јасно и недвосмислено да се покаже вистинската бројност на македонската заедница на овој континент.
Редовниот попис на населението во Австралија ќе се одржи во вторник, на 11 август 2026 година, а ќе го спроведе Австралиското биро за статистика. На пописната ноќ треба да бидат евидентирани сите лица што се наоѓаат во Австралија, вклучувајќи ги посетителите и лицата со привремени визи. Австралиското биро за статистика
Во пресрет на пребројувањето се засилува мобилизацијата меѓу припадниците на македонската заедница. Во активностите се вклучуваат бројни македонски здруженија и организации, двете австралиски епархии на Македонската православна црква – Охридска архиепископија, истакнати активисти, како и Агенцијата за иселеништво.
Пораката е едноставна: секој што има македонско потекло треба слободно и гордо да го внесе тоа во пописниот образец. Особено е важно правилно да се наведат македонското потекло, Македонија како земја на потекло, македонскиот јазик како јазик што се зборува во домот и македонското православие како верска припадност.
Официјалните податоци од пописот во 2021 година покажаа дека во Австралија живеат 111.352 лица што се изјасниле дека имаат македонско потекло. Од нив, 66.173 навеле дека во својот дом го зборуваат македонскиот јазик. SBS на македонски јазик
Сепак, активистите и долгогодишните познавачи на состојбите во македонската дијаспора проценуваат дека вистинскиот број на лица со македонско потекло е значително поголем и дека може да достигнува до 300.000. Разликата меѓу официјалните резултати и процените се должи на повеќе причини: дел од Македонците не го наведуваат своето потекло, некои ја запишуваат само земјата во која се родени нивните предци, додека кај помладите поколенија понекогаш се губи врската со јазикот и националното наследство.
Затоа пописот на 11 август претставува многу повеќе од статистичка операција. Тој е можност македонската заедница да ја покаже својата вистинска бројност, присутност и организираност.
Точните податоци имаат практично значење. Од нив зависат видливоста на заедницата, поддршката за изучување на македонскиот јазик, културните програми, медиумските содржини, грижата за повозрасните лица и застапеноста на Македонците пред австралиските институции.
На пописот во 2026 година граѓаните првпат ќе можат да наведат до четири потекла, наместо досегашните две. Тоа им овозможува и на лицата од мешани бракови, како и на нивните потомци, да го запишат македонското потекло без да мора да се откажат од друг дел од семејното наследство.
Голем успех и силно охрабрување за целата македонска дијаспора би било доколку на претстојниот попис официјалниот број достигне најмалку 200.000 лица со македонско потекло. Но тоа може да се постигне само ако секој Македонец биде правилно евидентиран.
Пописниот образец не е место за премолчување на сопствените корени. Македонското име, јазик, вера и потекло се наследство што треба да им се пренесе и на идните поколенија.
Затоа, на 11 август:
Потекло – македонско.
Земја на потекло – Македонија.
Јазик во домот – македонски.
Религија – македонско православие.
Секој Македонец е важен. Секое изјаснување се брои. Македонија треба да биде запишана онаму каде што живее – во срцата, во домовите и во официјалните податоци.
