СВЕТСКИ МАКЕДОНСКИ КОНГРЕС
МЕМОРАНДУМ ЗА СОРАБОТКА МЕЃУ СВЕТСКИОТ МАКЕДОНСКИ КОНГРЕС И МАКЕДОНСКОТО ПАТРИОТСКО ЗДРУЖЕНИЕ “ХРИСТО МАТОВ“
21 октомври 2017 година, Скопје, Македонија
– Светскиот Македонски Конгрес и Македонското патриотско здружение “Христо Матов“, денес во Скопје склучија Меморандум за соработка, координација и меѓусебна размена на искуства и информации.
Основни цели и задачи на договорните страни се: Духовно, културно и економско обединување на Македонците од сите делови на Македонија во целиот свет; Заштита и афирмација на македонскиот етнички, јазичен, културен, верски, историски и државен идентитет, континуитет, наследство и простор; Заштита и афирмација на човековите и граѓанските права и слободи; Развој на демократијата; и Афирмација на целите и задачите на Обединетите Нации.
Светскиот Македонски Конгрес и Македонското патриотско здружение “Христо Матов“ во меѓусебната соработка ќе се придржуваат на следните принципи на работа: Се почитува автономијата и самостојноста на договорните страни; Договорните страни се рамноправни и еднакви во остварувањето на правата, независно од бројот на членството и статусот; Договорните страни имаат толкави обврски колку што самостојно и доброволно ќе прифатат од заеднички договореното; Договорните страни имаат пред се’ морална одговорност за обврските што доброволно ги прифатиле од заеднички договореното; и Секоја договорна страна не одговара за постапките и дејствувањето на другата договорна страна во реализацијата на своите цели и задачи и во реализацијата на заеднички договорените цели и задачи.
Претседател на Светскиот Македонски Конгрес Тодор Петров, на претседателот на Македонското патриотско здружение “Христо Матов“ од Скопје Тони Петрушев му ја предаде Одлуката за полноправно членство на Македонското патриотско здружение “Христо Матов“ од Скопје во Светскиот Македонски Конгрес, донесена на Дваесет и седмото Генерално Собрание на Светскиот Македонски Конгрес одржано на 5 август 2017 година, во Музејот на македонската револуционерна борба во Скопје.
Светскиот Македонски Конгрес и Македонското патриотско здружение “Христо Матов“ од Скопје се против донесување на Законот за употреба на јазиците и отфрлаат двојазичност на територијата на Република Македонија и во нејзините меѓународни односи.
Светскиот Македонски Конгрес и Македонското патриотско здружение “Христо Матов“ од Скопје се против промена на името на државата и идентитетот на нацијата.
Светскиот Македонски Конгрес и Македонското патриотско здружение “Христо Матов“ од Скопје повторија дека, се’ додека за Софија, Македонија е дел од Бугарија, Македонците се Бугари, а Македонскиот јазик е дијалект на бугарскиот јазик, Договорот меѓу Зоран Заев и Борис Борисов претставува велепредавство на државата и нацијата!
Светскиот Македонски Конгрес и Македонското патриотско здружение “Христо Матов“ од Скопје сметаат дека Стратегијата за интеграција на бегалци и странци 2017-2027 година и Националниот акциски план за интеграција на бегалци 2017-2027, како и измените на Законот за олеснети услови за прием на бегалците и мигрантите во македонско државјанство се неприфатливи за Македонскиот народ, воопшто за сите во Македонија и бараат Владата да ги отфрли, затоа што ја менуваат етничката и верската карта на Македонија, и претставуваат вовед за дестабилизација на Македонија!
Светскиот Македонски Конгрес и Македонското патриотско здружение “Христо Матов“ од Скопје отфрлаат транзит и времен престој на бегалци и мигранти од Грција во Македонија и препорачуваат, доколку Европската Унија е заинтересирана за нив, Брисел да организира нивна директна депортација од Грција во Западна Европа!
Светскиот Македонски Конгрес и Македонското патриотско здружение “Христо Матов“ од Скопје од Македонската Влада бараат да ја зајакне доизградбата на заштитната ограда на границата кон Грција и да го зголеми бројот на силите за безбедност за спречување на нелегалните премини на бегалци и мигранти од Грција во Македонија!
