Делегација на македонското Собрание во посета на Израел
Продлабочување на парламентарната соработка, средби во израелските институции и оддавање почит на жртвите на Холокаустот беа дел од посетата на собраниската делегација, предводена од Рашела Мизрахи.
На покана на Министерството за надворешни работи на Државата Израел, делегација на Собранието на Република Македонија престојуваше во Израел од 11 до 16 октомври 2026 година.
Делегацијата ја предводеше пратеничката Рашела Мизрахи, претседателка на Групата за соработка, а во нејзиниот состав беа пратениците Беким Ќоку, Бобан Карапејовски, Зоранчо Јованчев, Илир Хасани, Јован Јаулески, Катерина Димитровска, Малиша Станковиќ, Мартин Стојановски, Моника Зајкова, Петар Марков, Славјанка Петровска и Тони Јаревски.
Програмата започна со средба со претставници на Кнесетот, на која беше истакната континуираната билатерална соработка меѓу Македонија и Израел. Се разговараше за зголемување на трговската размена и за продлабочување на соработката во здравството, земјоделството, безбедноста, претприемништвото, културата и туризмот.
Пратениците го посетија и Врховниот суд на Израел, каде што поблиску се запознаа со неговата работа.
Во рамките на посетата на Клиничката болница „Хадаса“ и на „Хадасит“ – Иновацискиот центар за медицина, делегацијата се запозна со работата на медицинскиот центар и со моделот што овозможува развој на иновативни медицински помагала и техники.
Во Светскиот центар за сеќавање на Холокаустот „Јад Вашем“, делегацијата учествуваше во церемонија на полагање венец, оддавајќи им почит на жртвите на Холокаустот. Венци беа положени и на гробовите на Теодор Херцл, Јицак Рабин и Шимон Перес.
Македонските пратеници остварија средба и со ерусалимскиот патријарх Теофилос. Во име на делегацијата, пратеникот Петар Марков се заблагодари за приемот, а патријархот ја истакна важноста на религијата во разрешувањето на етничките конфликти.
Во Тел Авив, делегацијата го посети Центарот „Перес“ за мир и иновации, каде што беа претставени технолошки иновации од различни области. Во Медицинскиот центар „Волфсон“ во Холон, пратениците се запознаа со работата на одделот за трауматологија и со пристапот во згрижувањето на пациентите.
Програмата опфати и запознавање со работата на Израелската управа за противпожарна заштита и спасување, како и посета на постројка на „Мекорот“ за третман на вода и десалинизација.
Престојот во Израел заврши со посета на Институтот за студии за национална безбедност.
Преземено и уредено од соопштение на Собранието на Република Македонија.
