БЕРЛИН, 8 септември 2026 година
На свечен прием во Берлин, организиран од македонското Министерство за надворешни работи и надворешна трговија, а со поддршка од македонски и германски стопанственици, беше одбележан 8 Септември – Денот на независноста на Република Македонија.
Свеченоста се одржа во репрезентативните простории на Претставништвото на германската сојузна покраина Северна Рајна-Вестфалија. Настанот го потврди значајното присуство на македонската заедница во општествениот и политичкиот живот на Сојузна Република Германија.
На свечениот прием присуствуваше и висока делегација на Централниот совет на Македонците во Германија. Неговите претставници ја нагласија потребата од натамошно унапредување на економската соработка меѓу Македонија и Германија, како и од посилно поврзување на граѓанските организации од двете земји.
Посебно внимание на свечениот прием му беше посветено на дипломатскиот ангажман на амбасадорот проф. д-р Илбер Села. Под негово раководство беше унапредена соработката меѓу македонската Амбасада во Берлин и организираната македонска дијаспора, врз основа на заемна почит, доверба и конструктивно партнерство.
„Амбасадорот проф. д-р Илбер Села ужива почит меѓу Македонците во Германија како дипломат кој придонесува за поголема видливост на македонската заедница и за зацврстување на врските меѓу Македонија и Германија“, порачаа претставниците на Централниот совет.
Одржувањето на прославата во значајна германска институција, каква што е Претставништвото на Северна Рајна-Вестфалија, сведочи за угледот и воспоставените врски на македонската дипломатија во Германија.
Претставниците на Централниот совет ја нагласија потребата од продлабочување на економската соработка и од посилно поврзување на граѓанските организации од двете земји.
„Со посветена работа се градат мостови меѓу Македонија и Германија и се отвораат нови можности за Стопанска и културна соработка“, истакнаа од Централниот совет.
Свечената атмосфера беше збогатена со музичка програма во изведба на меѓународно познатата македонска пијанистка Ана Мицева и германскиот оперски пејач Себастијан Наглацки. Нивниот настап го истакна значењето на германско-македонската културна размена.
