Македонска Нација
Министерката за финансии Гордана Димитриеска-Кочоска упати јавен повик до економскиот тим на опозицијата за средба во Министерството за финансии, со цел, како што посочи, „да се разјаснат економските факти и бројки“, по серијата прес-конференции на СДС и Венко Филипче.
Според Димитриеска-Кочоска, во јавноста во изминатиот период се пласирале, како што рече, „невистини, погрешни толкувања и очајни политички конструкции“, додека реалните економски показатели покажувале стабилизација и раст на македонската економија.
„За економијата не се зборува со паника. За економијата зборуваат бројките. А токму со бројките опозицијата не стои баш добро“, истакна министерката.
Таа потсети дека Владата ја презела државата во, како што оцени, исклучително тешка финансиска состојба.
„Од 2017 до 2024 година просечниот раст на БДП беше околу 1,8 проценти, најслабото темпо на развој во регионот. Во 2017 година јавниот долг изнесуваше 4,78 милијарди евра, а до вториот квартал од 2024 година достигна речиси 9 милијарди евра. Тоа е практично двојно зголемување на јавниот долг за време на владеењето на СДСМ“, нагласи Димитриеска-Кочоска.
Министерката додаде дека денес состојбата е значително поинаква и дека економијата бележи стабилен раст.
„Во изминатите шест квартали економијата расте со околу 3 проценти, во време кога растот во Европската Унија е околу 1 процент. Македонската економија во 2025 година бележи стабилен раст од околу 3,5 проценти. Платите растат со динамика близу 10 проценти, бројот на нововработени лица расте, а капиталните инвестиции се реализираат на историски високо ниво“, рече таа.
Според неа, Министерството за финансии води одговорна политика за управување со јавниот долг и сервисирање на обврските наследени од претходната власт.
„Минатата година беше отплатена еврообврзница од 500 милиони евра. Оваа година за отплата е еврообврзница од 700 милиони евра, исто така земена од владите на СДСМ. Половина од оваа обврска веќе е сервисирана, а остатокот ќе биде сервисиран во текот на јуни 2026 година“, истакна министерката.
Таа посочи дека од 2026 до 2031 година државата има обврска да сервисира околу 9 милијарди евра по основ на главнина и камати од стари долгови.
„Само од втората половина на 2024 година до првиот квартал од 2026 година беа обезбедени 1,2 милијарди евра исклучиво за сервисирање на еврообврзници земени од претходната власт“, нагласи Димитриеска-Кочоска.
Во своето обраќање таа ја обвини претходната власт дека оставила хаос во јавните финансии, систем без јасен правец и економија погодена од инфлација и задолжувања.
„Денес, за разлика од тоа време, граѓаните повторно почнуваат да гледаат држава која работи за нив. Држава која покажува одговорност и ги враќа довербата, достоинството и чувството дека институциите конечно се во служба на граѓаните“, рече министерката.
Димитриеска-Кочоска порача дека Владата навремено презела мерки за стабилизација на пазарот и заштита на животниот стандард, посочувајќи дека Македонија денес има меѓу најниските цени на горивата во регионот.
На крајот, таа упати порака до опозицијата пред следните настапи внимателно да ги проверува податоците.
„Фактите, бројките и резултатите се на страната на Владата. А кога е така, политичките конструкции многу брзо паѓаат во вода“, истакна Димитриеска-Кочоска.
