Градоначалникот Орце Ѓорѓиевски од Израел порача дека Скопје мора да стане модерен, функционален и безбеден град, со подобра координација на институциите, почисти улици, подобар јавен превоз, повеќе зеленило и конкретни решенија што граѓаните ќе ги почувствуваат во секојдневниот живот.
Градоначалникот на Скопје, Орце Ѓорѓиевски, во интервју за Jerusalem Post порача дека главниот град на Македонија мора да стане попаметен, почист, поорганизиран и подобро подготвен за справување со кризни ситуации.
Ѓорѓиевски, кој престојува во Израел по повод конференцијата MUNI EXPO 2026, истакна дека целта на посетата е да се видат конкретни решенија и успешни практики кои можат да се применат во Скопје и да го подобрат животот на граѓаните.
Тој нагласи дека во Израел дошол со намера да учи од искуствата на локалните власти, стекнати во реални и сложени околности. Според него, посебен интерес претставуваат подобрата координација меѓу институциите, управувањето со кризи, паметните технологии, сообраќајот, јавната безбедност, управувањето со отпадот и водните ресурси.
„Израелските градови покажуваат дека локалната власт мора да биде подготвена пред да се случи кризата, а не да импровизира кога веќе е предоцна“, порача Ѓорѓиевски.
Како главен град, Скопје, според него, мора да изгради систем кој ќе може брзо и ефикасно да реагира при пожари, природни непогоди, загадување, сообраќајни колапси и сајбер-закани.
Говорејќи за иднината на европските градови, Ѓорѓиевски оцени дека најголемите предизвици ќе бидат мобилноста, загадувањето, инфраструктурата, безбедноста и квалитетот на животот. Неговата цел, како што рече, е Скопје да стане почист, позелен и подобро организиран град.
„Не верувам во големи зборови без реализација. Верувам во ред, работа и конкретни резултати“, истакна Ѓорѓиевски.
Тој не ја исклучи можноста за збратимување на Скопје со некој израелски град, но нагласи дека таквата соработка треба да има практична цел — размена на искуства, заеднички проекти и примена на успешни решенија во областите на иновациите, безбедноста, управувањето со водите и паметните технологии.
Осврнувајќи се на својата работа како градоначалник, Ѓорѓиевски рече дека најголем предизвик по преземањето на функцијата било враќањето на редот и довербата во институциите. Според него, Скопје е комплексен систем со различни потреби и очекувања, но има голем потенцијал, природни убавини, богато културно наследство и гостопримливи луѓе.
Во наредниот период, како што најави, приоритет ќе бидат почистите улици, подобриот јавен превоз, повеќе зеленило, поквалитетна инфраструктура и институции кои ќе бидат поблиску до граѓаните.
Во интервјуто Ѓорѓиевски се осврна и на односите меѓу Македонија и Израел, оценувајќи дека постои значителен простор за продлабочување на соработката меѓу градовите, особено во областа на дигиталните услуги, паметното управување со сообраќајот, енергетската ефикасност и иновациите.
Тој остро ја осуди секоја форма на антисемитизам, осврнувајќи се и на неодамнешниот обид за подметнување пожар во Еврејскиот културен центар и синагогата во Скопје. Ѓорѓиевски порача дека таквите напади се удар врз вредностите на градот и дека Скопје мора да остане место во кое сите граѓани ќе се чувствуваат безбедно, почитувано и еднакво.
На крајот, градоначалникот истакна дека неговата цел е по завршувањето на мандатот граѓаните да можат да кажат дека Скопје повторно станало град со ред, достоинство и јасна насока.
„Не сакам да бидам запаметен по големи зборови, туку по работа што луѓето ќе ја почувствуваат — почист град, подобар јавен превоз, уредени паркови, поголема безбедност и институции поблиску до граѓаните“, порача Ѓорѓиевски.
Извор: Скопје1.мк
